ساہیوال(پاکستان پوائنٹ نیوز25۔مئی2017ء) وزیر اعظم محمد نواز شریف نے آکھیا اے کہ الزام لان والیاں نوں پاکستان دی ترقی نہیں روکن دیواں گے، مخالف مینوں نہیں ملک نوں نقصان پہنچا رہے نیں، دہشت گردی دا لَک توڑ دتا، آخری دہشت گردی تک آپریشن جاری رہوے گا، 2018وچ بجلی دی لوڈشیڈنگ ختم ہو جائے گی، افسوس اے کہ ایتھے لوک منصوبیاں دا پیسا کھا جاندے نیں، پراجیکٹ مکمل کرن اُتے چائینز تے مزدوراں نوں اک مہینے دا بونس دتا جائے گا۔
اوہناں نے اج ساہیوال کول پاور پراجیکٹ دی افتتاحی تقریب نال خطاب کردے ہوئے آکھیا کہ ساہیوال کول پراجیکٹ نوں چھ مہینیاں وچ مکمل کیتا گیا اے۔ منصوبے دا دوجا یونٹ جون دے پہلے ہفتے بجلی پیدا کرنی شروع کر دیوے گا۔ ساہیوال کول پراجیکٹ دی پیداواری صلاحیت 1320میگا واٹ اے۔اوہناں نے آکھیا کہ بھکھی پاور پلانٹ دا وی کُجھ مہینے پہلے افتتاح کیتاگیا۔
ساہیوال پراجیکٹ منصوبا پنجاب سپیڈاور مسلم لیگ (ن) سپیڈ منصوبا اے۔وزیر اعظم نے خطاب دوران وزیر اعلا پنجاب نوں مخاطب کردے ہوئے آکھیا کہ شہباز شریف تُسیں اصل ہیرو او، تسیں ای ایس مبارکباد دے حق دار او۔ وزیر اعظم دا کہنا سی کہ ملک وچ آخری دہشت گرد تک آپریشن جاری رہوے گا، جدوں اقتدار وچ آئے لوڈ شیڈنگ ورگے وڈے چیلنجاں دا ساہمنا سی پر ملک وچ بجلی دی لوڈشیڈنگ اُتے ڈاڈھی حد تک قابو پا لیا گیا اے۔
اوہناں نے آکھیا کہ 2018وچ بجلی دی لوڈشیڈنگ ختم ہو جائے گی۔ سسٹم وچ بجلی ای نہیں آ رہی بلکہ بجلی سستی وی ہو رہی اے۔ وزیر اعظم نے آکھیا کہ سی پیک اُتے عملدرآمد لئی چینی سفیر دا کردار تعریف جوگ اے۔ سی پیک پاکستان لئی گیم چینجر اے، سی پیک راہیں 56ارب ڈالر دی سرمایا کاری ہو رہی اے ملک وچ کراچی توں پشاور تک موٹرویز وی بنا رہے آں۔
