اسلام آباد(پاکستان پوائنٹ نیوز24۔مئی2017ء) امل بن لادن، اسامہ دی چوتھی تے سبھ توں نکی بیوی نے پہلی وار اسامہ بن لادن دی موت دی کہانی بیان کر دتی۔غیر ملکی خبر رساں ایجنسی دے مطابق امل بن لادن دا کہنا سی کہ جدوں 10مئی 2011نوں اسامہ بن لادن دا قتل کیتا گیا اوس ویلے اسامہ بن لادن 6بالاں نال پاکستان دے شہر ایبٹ آباد وچ سی۔ ایس گھر وچ اسامہ بن لان دی دوجی بیوی خیریاہ تے تیجی بیوی سیہام تے پُتر خالد موجود سن۔
جدکہ پہلی بیوی نجوا جہدی اسامہ بن لادن نال جوانی وچ شادی ہوئی سی ،اوہدے وچوں 11بال سن اوہ 9/11دے واقعے توں صرف دو دن پہلے اوہنوں چھڈ گئی سی۔امل نے دسیا کہ 1مئی 2011دی رات 11وجے روٹی کھان تے نماز توں فارغ ہو کے جدوں اسیں بسترے وچ سُتے ہوئے ساں، اوس ویلے بجلی وی نہیں سی جس کارن باہر انھیرا سی۔ امل نے دسیا ایس دوران کُجھ آوازاں کارن میری اکھ کھل گئی تے مینوں باری اُتے کُجھ سائے نظر آئے ۔ مل نے دسیا کہ ایس دوران بن لادن دی وی اکھ کُھل گئی تے اوہ مینوں سہمے ہوئے لگے۔ اوہناں نے آکھیا کہ ’امریکی آ رہے نیں‘یکدم اک زور دار آواز آئی، اسیں دوویں باری ول چلے گئے، اوس رات چن دی چاننی نہیں سی ایس لئی سانوں کُجھ نظر نہیں آ رہیا سی۔
