اسلام آباد (پاکستان پوائنٹ نیوز10۔اگست 2016ء) سپریم کورٹ نے عمران فاروق قتل کیس دے ملزم معظم علی دی ضمانت درخواست رد کردے ہوئے اسلام آباد ہائی کورٹ دا فیصلا برقرار رکھیا اے۔ جسٹس آصف سعید کھوسہ دی سربراہی وچ دو رکنی بنچ نے معظم علی دی درخواست دی سنوائی کیتی۔ ملزم دے وکیل نے عدالت نوں دسیا کہ معظم علی نے شریک ملزماں نوں لندن دے کالج وچ داخلے وچ مدد دِتی تے معظم علی اس توں پہلے وی کئی پڑھیاراں دے داخلے وچ مدد کر چکیا اے پر اوہ عمران فاروق قتل دی سازش دا حصا نہیں سی۔
جسٹس آصف سعید کھوسہ نے معظم علی قتل دے سازش وچ ملوث ہون دے ثبوت بارے پچھیا۔جہدے تے سرکاری موکل نے عدالت نوں دسیا کہ معظم علی نے شریک ملزماں نوں ایڈمیشن دوان وچ پوری مدد فراہم کیتی سی۔ شریک ملزم عمران فاروق قتل توں پہلے تے بعد وچ اک دوجے نال رابطے وچ سن۔ سپریم کورٹ دا جواب وچ آکھنا سی کہ معظم علی دا عبوری چالان ٹرائل کورٹ وچ پیش کیتا جا چکیا اے ایس لئی ایہدے مقدمے وچ مداخلت کرنا مناسب نہیں۔ جہدے بعد سپریم کورٹ نے ملزم معظم علی دی ضمانت درخواست رد کر دِتی۔
