اسلام آباد(پاکستان پوائنٹ نیوز22۔مئی2017ء) تحریک انصاف دے چیئرمین عمران خان نے آکھیا اے کہ سعودی عرب وچ وزیر اعظم نال ہون والے مَندے سلوک اُتے پاکستانی قوم شرمندا اے، ٹرمپ نے فلسطین دے چُنے گئے نمائندیاں نوں دہشت گرد قرار دتا، ٹرمپ دے خطاب اُتے وزیر اعظم نوں کوئی تے بیان دینا چاہیدا سی، آرمی چیف نال ملیا تے پتا چلیا کہ جنرل راحیل دا اتحادی فوج وچ کردار مسلم دنیا نوں انتشار توں روکنا اے، سوشل میڈیا اُتے کوئی کسے نوں گل کرن توں نہیں ڈکیا جاسکدا۔
اوہناں نے اج پارٹی اجلاس مگروں میڈیا نال گل بات کردے ہوئے آکھیا کہ سعودی عرب وچ وزیر اعظم نال مَندے سلوک اُتے قوم شرمندا اے، نواز شریف نوں جان دی لوڑ کیہ سی؟ عمران خان نے آکھیاکہ نیٹ پریکٹس وی کیتی پر میچ نہیں کھیڈیاگیا۔ عمران خان دا کہنا سی کہ سمجھ نہیں آئی کہ وزیر اعظم اوتھے گئے کیوں؟ وزیر اعظم دے باہرلے ملک اک دن دے دورے اُتے 47لکھ خرچا آیا۔
اوہناں نے آکھیا کہ ٹرمپ نے خطاب وچ حزب اللہ تے حماس نوں دہشت گرد بنا دتا، جو وی اسرائیل دا دشمن اوہنوں دہشت گرد بنا دتا گیا۔ ٹرمپ نے فلسطین دے چُنے گئے نمائندیاں نوں دہشت گرد قرار دتا جہدے اُتے وزیر اعظم نے کوئی گل نہیں کیتی۔ عمران خان نے آکھیا کہ وزیر اعظم نوں کہنا چاہیدا سی کہ دہشت گردی خلاف ساڈے ملک نے بہت ساریاں قربانیاں دتیاں نیں۔
