پشاور(پاکستان پوائنٹ نیوز17۔مئی2017ء) شریک چیئرمین پیپلزپارٹی آصف زرداری نے آکھیا اے کہ میاںصاحب شیر چنگا جنور نہیں ہوندا اوہ ماڑیاں نوں کھا جاندا اے، سونامی چنگی شے نہیں سونامی تے تباہی لیاندا اے، پشاور وچ پرانا پاکستان وی اُجڑیا ہویا نظر آ رہیا اے، خیبرپختونخوا وچ سونامی نہیں کوئی ہور جماعت اقتدار وچ ہووے گی، پی ایس پی نوں پارٹی ای نہیں مَندا، ٹکٹاں آپ ونڈاں گا، آن والی حکومت ساڈی ہووے گی۔
تفصیل دے مطابق اج پشاور وچ پریس کانفرنس کردے ہوئے آصف زرداری دا کہنا سی کہ پشاور وچ کسے نے وی نہیں آکھیا کہ اسیں نویں پاکستان توںخش آں، پشاور وچ کیتے وی نواں پاکستان نہیں ویکھیا ، مینوں تے ایتھے پرانا پاکستان وی اُجڑیا ہویا نظر آ رہیا اے۔ اوہناں نے آکھیا کہ سونامی چنگی شے نہیں سونامی تے تباہی لیاندا اے، کے پی کے وچ سونامی نے تباہی مچائی۔
امید اے ہن خیبر پختونخوا وچ سونامی نہیں کوئی ہور جماعت اقتدار وچ ہووے گی۔ آصف زرداری نے آکھیا کہ شیر ہر شے نوں کھان دی گل کر رہیا اے، میاں صاحب وی آکھ رہے نیں کہ ہر شے کھا جاواں گا۔ اوہناں دا کہنا سی کہ اپنے آپ نوں شیر آکھن والیاں نوں پتا ہونا چاہیدا کہ شیر درندا ہوندا اے، میاں صاحب شیر چنگا جنور نہیں ہوندا اوہ ماڑیاں نوں کھا جاندا اے، حکومت دے چارورھے لنگھ گئے پر وعدے پورے نہیں ہوئے جدکہ اسیں اُتوں ہیٹھاں تک ساریاں دیاں 150فیصد تنخاہواں ودھائیاں۔ آصف زرداری نے آکھیا کہ جنوبی پنجاب، بلوچستان ، خیبرپختونخوا تے سندھ وچ الیکشن دوران ہر تھاں نکلاں گے۔
