اسلام آباد(پاکستان پوائنٹ نیوز17۔مئی2017ء) برطانیا وچ پی آئی اے جہاز توں منشیات برآمد ہون دے معاملے دیاں کسٹم حکام نے تحقیقات کر لئیاں نیں۔ تفصیل دے مطابق مڈھیلیاں تحقیقات وچ ایہ گل ساہمنے آئی اے کہ جہاز 8مئی نوں 20گھنٹے کراچی وچ منٹیننس 3ڈپارٹمنٹ کول رہیا۔ جہاز وچ منشیات کراچی توں رکھے جان دا امکان اے۔ محکمہ کسٹم اسلام آباد دے جائزے مگروں پتا لگا اے کہ منشیات لیٹرین دے نال نال جہاز دی چھت وچ وی لُکائی گئی سی۔
وسیلیاں مطابق جہاز دی چھت وچ منشیات لُکان دا کم منٹاں دا نہیں گھنٹیاں دا اے۔ جہاز کراچی مگروں لاہور، اسلام آباد، برطانیا تے سعودی عرب وی گیا۔ برطانیا وچ مانچسٹر تے سعودی عرب وچ جدہ ائر پورٹ اُتے جہاز 2توں 3گھنٹے رُکیا۔ چیتے رہوے کہ ہیتھرو ائر پورٹ اُتے پہنچن والے پی آئی اے دے جہاز دی تلاشی دوران اوہدے چوں منشیات برآمد ہوئی سی، جہدے مگروں عملے توں کئی گھنٹیاں تک پُچھ گچھ کیتی گئی۔ نیشنل کرائم ایجنسی نے دسیا کہ جہاز وچ منشیات دی موجودگی اُتے عملے نوں حراست وچ لِتا گیا سی۔
