لاہور(پاکستان پوائنٹ نیوز13۔مئی2017ء) دنیا بھر وچ ہیٹھلی ذات دے لوکاں نوں گھٹیاسمجھیا جاندا اے تے اوہناں دی معاشرے وچ کوئی عزت وی نہیں کردا پر پچھلے دِنا ای لاہور ہائی کورٹ دے چیف جسٹس نے سارے نسلی تے مذہبی فرق ختم کردے ہوئے عدالت دے خاکروب دے ریٹائرڈ ہون اُتے دتی جان والی الوداعی پارٹی وچ رلت کر کے ساریاں نوں حیران کر دتا۔ چیف جسٹس لاہور ہائی کورٹ نے آکھیا کہ ہائی کور ٹ دے سینئر عہدیداراں توں لے کے خاکروب تک سارے بندے عدالت دا اثاثا نیں۔
اوہناں نے آکھیا کہ یونس مسیح عرف باب بنگالی عدالت لئی اک اثاثا اے۔ اوہناں نے اپنے خطاب وچ ہائی کورٹ اندر کم کرن والے سارے ملازماں دیاں خدمتاں نوں سلاہیا۔ چیف جسٹس نے آکھیا کہ آن والے ویلے وچ کسے وی ملازم دی ریٹائرمنٹ اُتے پیار دے اظہار دے طور اُتے لاہور ہائی کورٹ دی سرکاری گڈی اوہنوں گھر تک چھڈن جائے گی۔ بنگالی نوں خراج تحسین پیش کردے ہوئے چیف جسٹس منصور علی شاہ نے آکھیا کہ لاہور ہائی کورٹ وچ کم کرن والے سارے ملازم عزت دے حقدار نیں، میں ہمیشہ بنگالی نوں عقیدت تے لگن نال کم کردے ویکھیا۔
اوہناں نے الوداعی تقریب وچ بنگالی نوں لاہور ہائی کورٹ دی اک شیلڈ تے پُھلاں دا گلدستہ دتا۔ میڈیا رپورٹ دے مطابق ہائی کورٹ وچ کسے خاکروب نوں دتی گئی ایہ پہلی الوادعی پارٹی اے جہدے وچ حاضر سروس چیف جسٹس نے رلت کیتی ہووے۔ چیف جسٹس منصور علی شاہ دے ایس اقدام نوں ڈاڈھا سلاہیا گیا اے۔
