اسلام آباد(پاکستان پوائنٹ نیوز11۔مئی2017ء) ڈان لیکس دے معاملے بارے اک سوال دے جواب وچ وفاقی وزیر داخلا چودھری نثار علی خان نے آکھیا کہ تُسیں ویکھ لوو میں ایس معاملے اُتے تہاڈے نال اکھاں نہیں ملا رہیا۔ اوہناں نے آکھیا کہ اینے سوال کروا کہ ایہ تھک جان۔ ڈان لیکس اینا وڈا مسئلا نہیں سی جِنا بنا دتا گیا۔ ڈان لیکس اُتے حکومت نے جے کُجھ لُکانا ہوندا تے اک کمیشن نہ بناندی۔
ڈان لیکس اُتے بنائے گئے کمیشن وچ سٹیک ہولڈر موجود سن۔ جو باعزت تے سینئر سن۔ اوہناں نے آکھیا کہ میڈیا ریاست دا اک اہم تھم اے۔ خدا لئی کُجھ شیواں اپنے پیشے دیاں ذمے واریاں نوں وی سمجھ کے ساہمنے رکھو ،کسے وی ایشو اُتے تماشا نہیں لانا چاہیدا۔ سول ملٹری تعلقات نوں دنیا بھر وچ حساس سمجھیا جاندا اے۔ سول ملٹری تعلقات اُتے سیاست نہیں ہونی چاہیدی۔
میڈیا نال گل بات کردے ہوئے وزیر داخلا چودھری نثار علی خان نے آکھیا کہ سول ملٹری تعلقات دا تناظر سیاسی نہیں بلکہ قومی اے۔ ایہ اک حساس تعلق اے ایہدے اُتے اینا دھیان دین تے ڈرامے بازی دی لوڑ نہیں اے۔ ڈان لیکس وچ جے حکومت نوں کسے بندے یاں گروہ نوں بچانا ہوندا تے اوہ دو کمیٹیاں بناندی ۔ جو رپورٹ ساہمنے آئی اوہ اک متفقہ رپورٹ اے۔
