کوئٹہ(پاکستان پوائنٹ نیوز08۔مئی2017ء) پاک افغان سرحد توں 2کلو میٹر دور پنڈ کلی غزنی وچ 8ورھیاں دی نازیہ تے 9ورھیاں دے فرید اللہ اپنے گھر وچ کھیڈ رہے سن کہ اچن چیت افغان فورسز ولوں فائر کیتا گیا مارٹر گولا اوہناں دے گھر آن ڈِگا، جہدے نتیجے وچ دوویں بال شہید ہوگئے۔ شہید ہون والے بالاں دے والد عبدالہاری نے ایس واقعے نوں بیان کردے ہوئے دسیا کہ اوہ چمن بازار وچ سی کہ اوہنوں فون آیا، فون کرن والے نے دسیا کہ افغان فورسز ولوں فائر کیتا گیا مارٹر گولا اوہدے گھر ڈِگا اے۔
عبدالہاری نے اتھروں بھریاں اکھاں نال دسیا کہ افغان فورسز ولوں فائر کیتے گئے مارٹر گولے نال اوہدا اک پُتر، ماں تے تن بھتیجے زخمی وی ہوئے۔ مارٹر گولے نے مٹی دی کندھ نال بنے اوہدے گھر نوں وی نقصان پہنچایا۔ عبدالہاری دا کہنا سی کہ زخمی ہون والے بالاں نوں علاج لئی کوئٹہ منتقل کر دتا گیااے۔ دوجے پاسے ڈاکٹراں دے مطابق زخمی ہون والے بالاں دیاں عمراں 7توں 12دے وچکار نیں۔ڈاکٹراں دے مطابق بالاں دی حالت ہن خطرے توں باہر اے۔
