کراچی(پاکستان پوائنٹ نیوز06۔مئی2017ء) پاکستان پیپلز پارٹی دے رہنما منظور وسان اکثر ای خاباں تے اپنیاں پیشنگوئیاں دی وجہ توں خبراں وچ رہندے نیں۔ میڈیا نال گل بات کردے ہوئے پیپلز پارٹی رہنما منظور وسان نے آکھیا کہ پاناما کیس اُتے جے آئی ٹی بن گئی اے۔ میں پہلے ای آکھیا سی کہ جولائی بہت خطرناک اے۔ منظور وسان نے آکھیا کہ جولائی وچ کُجھ لوک رہن گے تے کُجھ بدل جان گے، جولائی وزیر اعظم نواز شریف لئی وی خطرناک اے۔
وزیر اعظم نوں تنقید دا نشانا بناندے ہوئے منظور وسان نے آکھیا کہ جدوں بھارتی تاجر مری وچ ملاقاتاں کرن، شک تے فیر پیدا ہون گے ای۔ سندھ دے مسائل اُتے گل بات کیتی جائے تے وزیر اعظم میٹنگ دا بہانا بنا کے چلے جاندے نیں۔ اوہناں دا کہنا سی کہ ساڈی حکومت وچ وزیر اعلا پنجاب بجلی دی لوڈشیڈنگ اُتے دھرنے دیندے نیں۔ منظور وسان نے ہور آکھیا کہ میں چاہنا واں کہ اپوزیشن وچکار اکٹھ ہووے۔
