ملتان(پاکستان پوائنٹ نیوز03۔مئی2017ء) وزیر مملکت برائے پانی و بجلی عابد شیر علی نے آکھیا اے کہ رمضان المبارک وچ سحری تے افطاری ویلے لوڈشیڈنگ نہیں ہووے گی، چالو ورھے دے آخیر وچ بجلی دی پیداوار 21ہزار میگا واٹ تک پہنچ جائے گی، مخالف لوڈشیڈنگ گھٹ ہون تے سستی بجلی دین اُتے احتجاج کرن جا رہے نیں، مریم نواز دی ودھدی ہوئی مقبولت توں لوک ڈرے ہوئے نیں، ایل پی جی دے ٹھیکے لین اُتے اعتزاز احسن دا احتساب شروع ہونا چاہیدا، چودھری نثار علی خان ڈان لیکس اُتے جواب دین گے۔
تفصیل دے مطابق میڈیا نال گل بات کردے ہوئے عابد شیر علی نے آکھیا کہ اسیں قوم نوں ایہ نہیں آکھیا سی کہ راتوں رات بجلی آ جائے گی، ساڈیاں کوششاں نال اج ملک وچ کیتے وی غیر اعلانیہ لوڈشیڈنگ نہیں ہو رہی جدکہ صنعتاں لوڈشیڈنگ توں مستثنا نیں، چالو ورھے دے آخیر تک ملک وچ بجلی دی پیداوار 21ہزار میگا واٹ تک پہنچ جائے گی پر بجلی اوتھے ملے گی جتھوں دے لوک بل دیندے نیں چوری کرن والیاں دی بجلی کٹ دتی جائے گی۔
عابد شیر علی نے آکھیاسحری تے افطاری ویلے لوڈشیڈنگ نہیں ہووے گی۔ پچھلے ورھے ایہناں دِناں وچ درجہ حرارت 34توں 36ڈگری سی پر چالو ورھے کئی علاقیاں وچ درجہ حرارت 47ڈگری تک ریکارڈ کیتا گیا اے جہدی وجہ توں بجلی دی منگ ودھی۔ بجلی بحران اُتے اپوزیشن دے احتجاج بارے اوہناں نے آکھیا کہ پیپلز پارٹی تے ہور مخالف لوڈشیڈنگ گھٹ ہون تے سستی بجلی دین اُتے احتجاج کرن جا رہے نیں، پکھے چُک کے احتجاج کرن والیاں نے اپنے دور وچ اک میگا واٹ وی بجلی پیدا نہیں کیتی۔
