پشاور(پاکستان پوائنٹ نیوز03۔مئی2017ء) پاکستان دا کوئی وی شعبہ ہووے، سواناں مرداں دے موڈھے نال موڈھا جوڑ کے کم کر رہیاں نیں۔ ہر شعبے وچ سوانیاں دی موجودگی ایس گل دا احساس دواندی اے کہ پاکستان دے مرداں دے نال نال سوانیاں وی کسے میدان وچ پچھانہ نہیں رہیاں پر ہن ایس گل دا عملی نمونا خیبر پختونخوا دے دارالحکومت پشاور تو تعلق رکھن والیاں تن بھیناں نے پیش کیتا اے جہناں ایشیا دی پہلی پی ڈی ایس ایلیٹ کمانڈوز ہون دا اعزاز حاصل کیتا اے۔
نوشہر دے پولیس ٹریننگ سکول وچ 11سوانیاں سنے 24کمانڈوز نوں تربیت دتی گئی۔ پر ایس بیچ دی خاص گل ایہدے وچ شامل تن بھیناں نیں۔پری گل، ثمینہ تے رخسانہ نوں ایشیا دی پہلی بی ڈی ایس (بم ڈسپوزل سکواڈ) دی کمانڈوز ہون دا اعزاز حاصل اے۔ ایہ تنوں بھیناں پچھلے 5ورھیاں توں بطور ایلیٹ کمانڈوز ملک دی خدمت کر رہیاں نیں۔ ایس عرصے دوران اوہناں نے کئی سرچ آپریشنز تے دہشت گرداں نوں گرفتار کرن دے آپریشنز وچ وی حصہ لیا۔
تِنوں بھیناں دا تعلق خیبر پختونخوا دے اک نِکے علاقے بدن خیل توں اے۔ اوہناں دا کہنا اے کہ اسیں اپنے والد توں متاثر آں جو اک کوئلے دی کان وچ مزدوری کردا سی، کیونکہ ساڈا تعلق اک متوسط طبقے توں سی ایس لئی کدی تے عید اُتے پان لئی ساڈے کول نویں کپڑے تک نہیں ہوندے سن تے بطور عیدی ملن والے پیسیاں نوں وی اپنے والد نوں دے دیندیاں ساں تاں جے اوہ گھر دا خرچ چلا سکن۔
