اسلام آباد(پاکستان پوائنٹ نیوز02۔مئی2017ء) پچھلے کُجھ دناں توں میڈیا وچ 10ارب رُپئے دا ڈاڈھا رولا سنائی دے رہیا اے۔ پی ٹی آئی چیئرمین عمران خان نے اک تقریب وچ خطاب دوران آکھیا کہ پاناما کیس اُتے مینوں چُپ رہن لئی دس ارب رُپئے دی پیشکش کیتی گئی سی تے ایہ پیشکش مینوں شہباز شریف تے میرے اک سانجھے دوست نے کیتی۔ عمران خان دے ایس بیان مگروں (ن) لیگی رہنماواں نے ایس گل نوں رد کردے ہوئے عمران خان نوں سانجھے بیلی دا ناں دسن دا آکھیا پر کپتان نے ایہ آکھ کے انکار کر دتا کہ میرے ناں لین نال اوہدے کاروبار اُتے اثر پئے گا پر ہن قومی اخبار ’دی نیوز‘ وچ چھپن والی اک رپورٹ وچ دسیا گیا اے کہ دس ارب رُپئے دی پیشکش والی خبر دی تہہ تک پہنچن لئی عمران خان تے شہباز شریف دے کُجھ سانجھیاں دوستاں نال رابطا کیتا گیا۔
گولڈ مارکیٹ وچ دلچسپی رکھن والے عمر فاروق جو کہ مشہور ’جم ’شپس‘ دے وی مالک نیں، عمران خان دے نال نال شریف خاندان نال وی اوہناں دے چنگے تعلقات نیں۔ دس ارب رُپئے دی پیشکش بارے سوال اُتے عمر فارق نے ہسدے ہوئے آکھیا کہ ایہ ناممکن اے۔ کسے نے اجیہی پیشکش لئی میرے نال رابطا نہیں کیتا تے نہ ای مینوں ایس معاملے دا کُجھ پتا اے۔ ایس توں وکھ قمر خان بوبی جوکہ سابق بنکر، اک بزنس مین تے مالی مشیر وی نیں، عمران خان دے قریبی دوست ہون دے نال نال اوہناں دے شہباز شریف نال چنگے تعلقات نیں۔
اوہناں نے ایس حوالے نال آکھیا کہ عمران خان میرے کزن نیں تے شہباز شریف نال وی میرے چنگے تعلقات نیں پر میری پچھلے کئی دِناں توں وزیرا علا پنجاب نال ملاقات تک نہیں ہوئی ایس لئی اوہناں راہیں عمران خان نوں پیسیاں دی پیشکش کرن دی گل دا سوال ای پیدا نہیں ہوندا۔ اوہناں دا کہنا سی کہ میں اخبار وچ ایس بارے خبر ویکھی تے سوچیا کہ عمران خان کولوں ایس حوالے نال پُچھاں گا۔
