اسلام آباد(پاکستان پوائنٹ نیوز01۔مئی2017ء) نجی ٹی وی چینل دے پروگرام وچ گل بات کردے ہوئے مشہور پرچا کار حامد میر نے آکھیاکہ اجے (ن) لیگی رہنماواں ولوں ہور استعفے آن گے، کُجھ وفاقی وزیر نیں تے کُجھ وزیر مملکت تے کُجھ جنوبی پنجاب دے ایم این ایز وی نیں۔ حامد میر دا کہنا سی کہ ایہ 40توں 42لوکاں دا گروپ اے جہناں نوں ڈاڈھے تحفظات نیں۔ اوہناں نے آکھیا کہ بجٹ آن توں پہلے کسان برادری وی ڈاڈھی پریشان اے، اوہ ایہ سمجھدے نیں کہ سانوں نہ پچھلے بجٹ وچ کوئی سہولتاں دتیاں گئیاں تے نہ ای اگلے بجٹ وچ کوئی چانس نظر آ رہیا اے، ایس توں وکھ دو تن وزیر اجیہے نیں جہناں دی فواد حسن فواد نال ڈاڈھی لڑائی اے تے اوہ ایہ سمجھدے نیں کہ فواد حسن فواد فیورٹزم کر رہے نیں جہدی وجہ توں ہور استعفے آن دی امید اے۔
حامد میر نے آکھیا کہ (ن) لیگ دے ٹویٹس ویکھ کے ایہ لگدا اے کہ اوہ معاملات نوں سلجھان وچ دلچسپی نہیں رکھدے۔ میں بنتی کراں گا کہ حالات نوں سمجھو، ایس حوالے نال وزیر اعظم نواز شریف نوں ذاتی طور اُتے ایس گل دا نوٹس لینا چاہیدا کہ سوشل میڈیا اُتے شیر دا ماسک پاکے ڈی جی آئی ایس پی آر تے فوج خلاف بیان بازی کیتی جا رہی اے۔ وزیر اعظم نوں چاہیدا کہ اوہ نوٹس لے کے ایہ کم بند کروان کیونکہ ایہدے نال حالات خراب ہون گے۔
