لاہور، فیصل آباد، لوئر دیر، میر پور، پشاور(پاکستان پوائنٹ نیوز22۔اپریل2017ء) ملک بھر وچ تیز انھیری تے بارش نے تباہی کھلار دتی، رُکھ تے سائن بورڈ ڈِگن نال 6بندے ہلاک تے درجناں زخمی ہوگئے، کئی مکانیاں دیاں چھتاں اُڈ گئیاں۔تفصیل دے مطابق ملک دے مختلف علاقیاں وچ رات ویلے انھیری تے بارش نال کئی حادثے ہوئے، لاہور وچ 90کلو میٹر فی گھنٹے دے حساب نال چلن والی انھیری تے بارش نے تباہی کھلار دتی مختلف علاقیاں وچ کھمبے تے سائن بورڈ ڈگن دیاں اطلاعواں ملیاں، رُکھ ڈِگن نال 32ورھیاں دا بشارت ہلاک جدکہ موسم دی خرابی کارن کئی اُڈاناں منسوخ کر دتیاں گئیاں۔
ڈیرا اسماعیل خان دے علاقے مریالی وچ مکان دی چھت ڈِگن نال سوانی تے بال ہلاک تے 6بندے زخمی ہوگئے، لوئر دیر وچ کندھ ڈِگن نال اک بندا ہلاک ہوگیا۔ ڈی آئی جی خان وچ اسمانی بجلی ڈِگن نال اک بندا ہلاک ہوگیا۔ جڑواں شہراں وچ وی انھیری نال سائن بورڈ ڈگن دے کئی واقعے ساہمنے آئے۔فیروز والا وچ تیزی انھیری کارن سائن بورڈ ڈگن نال دو بندے زخمی ہوگئے، شیخوپورا کرکٹ سٹیڈیم وچ انھیری کارکن بجلیاں دیاں تاراں ٹُٹ کے راہ جاندی گڈی اُتے ڈگ گئیاں، جہدے نتیجے وچ گڈی نوں اگ لگ گئی۔
