اسلام آباد(پاکستان پوائنٹ نیوز22۔اپریل2017ء) نجی ٹی وی چینل دے پروگرام وچ گل بات کردے ہوئے عوامی مسلم لیگ دے سربراہ شیخ رشید نے دعوا کیتا کہ ڈان لیکس دے معاملے اُتے حکومت تے پاک فوج وچکار معاملات طے ہو گئے نیں۔ اوہناں نے آکھیا کہ پاناما کیس اُتے سپریم کورٹ نے جے آئی ٹی بنان دا حکم دتا اے جہدے وچ آئی ایس آئی تے ایم آئی نوں شامل کیتا جائے گا، ایہ سارے ادارے احترام جوگ نیں۔
شیخ رشید نے آکھیا کہ جو وی کر لوو جے آئی ٹی وچ شامل ہون والے ایہ ادارے نواز شریف دے ماتحت نیں۔ کسے وی ادارے دا ڈی جی یاں چیئرمین جے آئی ٹی وچ نہیں بیٹھے گا بلکہ جے آئی ٹی وچ کسے کرنل یاں بریگیڈیئر نوں گھل دتا جائے گا۔ شیخ رشید نے ڈان لیکس دے حوالے نال آکھیا کہ ڈان لیکس اُتے وی اعتراض کیتا گیا سی پر ہن حکومت تے پاک فوج وچکار معاملات طے ہو گئے نیں۔
پرویز رشید نوں پہلے گھل دتا گیا سی پر ہن طارق فاطمی وی چلا جائے گا۔ اوہناں نے آکھیا کہ لوکائی خلاف سازش کیتی جا رہی اے، سارے لوک تے ادارے وی اپنے معاملات طے کردے نیں۔ پاناما دے فیصلے اُتے لوکائی خش نہیں اے۔ شیخ رشید دا کہنا سی کہ فیصلا سُنن مگروں اوہناں نے جوش نال قوم نال خطاب دی تقریر رکھی سی پر جدوں اوہناں نوں پتا لگا کہ اینی وی کلین چٹ نہیں ملی تے قوم نال خطاب دا اعلان واپس لے لیا۔ شیخ رشیددا کہنا سی کہ نواز شریف سلو وزیر اعظم نیں، اوہناں دا اپنا کوئی مطالعہ یاں نظریا نہیں اے۔ اوہناں نوں لوک آکے دسدے نیں تے فیر اوہ سُنیاں سنائیاں گلاں اُتے حکومت چلاندے نیں۔
