مینگورہ(پاکستان پوائنٹ نیوز19۔اپریل2017ء) 22اکتوبر 2012نوں طالبان ولوں کیتے گئے حملے نوں جے یاد کیتا جائے تے بغیر سوچے سمجھے ملالہ دا خیال آﺅندا اے پر سچ تے ایہ اے کہ شدت پسنداں دے ایس حملے وچ دو ہور پڑھیاراں وی زخمی ہوئیاں سن۔کائنات ریاض تے شازیہ رمضان ناں دیاں کُڑیاں دی زندگی وی ملالہ یوسفزئی وانگ بدل گئی سی۔ ملالہ یوسفزئی سنے ایہ تِنوں پڑھیاراں کیمسٹری دا پرچہ دین مگروں مینگورہ وچ موجود اپنے سکولوں واپس آ رہیاں سن کہ اوہناں اُتے فائرنگ کیتی گئی۔
ایس واقعے مگروں ملالہ یوسفزئی نوں پہچانیا جان لگا پر کائنات تے شازیہ گواچ کے رہ گئیاں۔ ایس واقعے دے اک سال مگروں ای شازیہ تے کائنات نوں انگلینڈ وچ مکمل سکالر شپ اُتے اک سکول وچ داخلا مل گیا۔ اوہناں نے اقوام متحدہ دے اُچیچے نمائندے راہیں اپنے ویزے لئے۔ برطانیا وچ ہائی سکول اندر تعلیم لین مگروں ہن کائنات تے شازیہ برطانیا دی ایڈن برگ یونیورسٹی وچ داخلے لئی کوششاں کر رہیاں نیں۔
دوویں پڑھیاراں نوں ایڈن برگ یونیورسٹی ولوں تعلیم حاصل کرن دی پیشکش کیتی گئی اے۔ شازیہ تے کائنات دا کہنا اے کہ سانوں ملالہ یوسفزئی اُتے فخر اے اسیں بیتے ویلے وی ملالہ یوسفزئی دا ساتھ دتا تے آن والے ویلے وچ وی اوہدے نال آں۔ دوویں پڑھیاراں نے پاکستان واپسی اُتے تعلیم دی ودھوتری دے حوالے نال مہم چلان دا فیصلا کیتا اے ۔ایس حوالے نال کائنات دا کہنا سی کہ ملک واپس جا کے معاشرے اندر تبدیلی لیان دی کوشش کراں گی۔
