اسلام آباد(پاکستان پوائنٹ نیوز19۔اپریل2017ء) پاناما دا فیصلا جو وی آئے پر پاکستان تحریک انصاف نے لوکائی وچ جان دا فیصلا کر لیا۔ تفصیل دے مطابق پی ٹی آئی چیئرمین عمران خان دی صدارت ہیٹھ اج مشاورتی اجلاس ہویا۔ اجلاس وچ پی ٹی آئی دی مرکزی تے صوبائی قیادت نے رلت کیتی۔ اجلاس وچ پاناما دے فیصلے مگروں پارٹی حکمت عملی بارے غور کیتا گیا۔ اجلاس اندر فیصلا کیتا گیا کہ پاناما دا فیصلا جو وی آئے پی ٹی آئی لوکائی وچ جائے گی۔
اجلاس اندراسلام آباد دے پریڈ گراﺅنڈ وچ جلسہ کرن دی تجویز وی پیش کیتی گئی پر جلسے دی تاریخ تے تھاں دا تعین اسلام آباد انتظامیا دی اجازت نال مشروط ہووے گا۔ وسیلیاں نے دسیا کہ عمران خان نے پاناما فیصلے دے موقع اُتے کارکناں نوں سپریم کورٹ آن توں روکن دا حکم دتا۔ عمران خان نے آکھیا کہ صرف مرکزی قیادت فیصلا سُنن عدالت جائے۔ اجلاس اندر فیصلا کیتا گیا کہ پاناما فیصلا سنائے جان مگروں فورن اجلاس بُلاکے حکمت عملی طے کیتی جائے گی۔ تحریک انصاف دے چیئرمین نے اسلام آباد تنظیم نوں جلسے لئی متحرک کرن دا وی حکم دتا۔ دوجے پاسے وسیلیاں نے دسیا کہ پی ٹی آئی نے پاناما دے فیصلے توں پہلے ای متوقع جت دی خشی وچ مٹھائیاں دا آرڈر دے دتا اے۔
