اسلام آباد(پاکستان پوائنٹ نیوز18۔اپریل2017ء) وزیر مملکت برائے پانی و بجلی عابد شیر علی نے آکھیا اے کہ چار پاور پلانٹ اُتے کم جاری اے، پاور پلانٹ چلن نال لوڈشیڈنگ معمولی اُتے آ جائے گی، 2220 میگا واٹ بجلی سسٹم توں غائب اے، تواریخ وچ پہلی وار اپریل دے مہینے وچ 45ڈگری گرمی ریکارڈ کیتی گئی، سندھ وچ سبھ توں بہتی بجلی چوری کیتی جا رہی اے، ملک وچ آپریشن راہیں دہشت گردی 90فیصد ختم ہوئی اے، کُجھ قومانتری تنظیماں پاکستان نوں کمزور کرن لئی سازشاں کر رہیاں نیں، داعش ورگی تنظیم وچ مقامی لوک شامل نیں، حکومت ایہناں لوکاں نال سختی نال نبڑے گی۔
تفصیل دے مطابق منگل نوں پارلیمنٹ ہاﺅس دے باہر میڈیا نال گل بات کردے ہوئے اوہناں نے آکھیا کہ پاور پلانٹ چلن نال لوڈشیڈنگ معمولی اُتے آ جائے گی، 2220 میگا واٹ بجلی سسٹم توں غائب اے، نندی پور پاور پلانٹ نوں فرنس آئل توں گیس اُتے منتقل کیتا جا رہیا اے جہدی وجہ توں 525میگا واٹ بجلی سسٹم توں غائب اے جدکہ پاور پلانٹ اُتے سوئی گیس دا پریشر گھٹ ہون کارن 750میگا واٹ بجلی منصوبے توں گھٹ پیدا ہو رہی اے۔
وزیر مملکت نے آکھیا کہ سکھی پاور پلانٹ نوں دسمبر 2017وچ مکمل ہونا سی پر اوہدے اُتے کم مئی وچ مکمل ہو جائے گا، جہدے نال تقریبن 15مئی نوں سکھی پاور پلانٹ کم شروع کر دیوے گا، کجھ پاور پلانٹ اُتے مرمت دا کم جاری اے جہدی وجہ توں پیداوار وچ کمی آئی اے۔ وزیر مملکت نے آکھیا کہ تواریخ وچ پہلی وار اپریل دے مہینے وچ 45ڈگری گرمی ریکارڈ کیتی گئی۔ اوہناں نے آکھیا کہ دو دناں تک لوڈشیڈنگ پاور پلانٹ چلن نال معمول اُتے آ جائے گی۔ اوہناں دا کہنا سی کہ سندھ وچ سبھ توں بہتی بجلی چوری کیتی جا رہی اے اوتھے چار ہزار لوکاں خلاف مقدمے درج کرائے۔
