راولپنڈی(پاکستان پوائنٹ نیوز18۔اپریل2017ء) آرمی چیف نال امریکا دے مشیر قومی سلامتی دی ملاقات ہوئی اے۔ تفصیل دے مطابق جی ایچ کیووچ آرمی چیف نال امریکا دے مشیر قومی سلامتی میک ماسٹر دی ملاقات ہوئی۔ ملاقات وچ پاک امریکا تعلقات تے دفاعی تعاون سنے علاقائی سلامتی دے امور اُتے گل بات ہوئی۔آئی ایس پی آر دے مطابق امریکی قومی سلامتی دے مشیر نے دہشت گردی خلاف جنگ وچ پاکستان دی تعریف کیتی۔
ملاقات وچ خطے دے امن و استحکام لئی پاکستان دے کردار اُتے بریفنگ وی دتی گئی۔ امریکی مشیر دا کہنا سی کہ دہشت گردی دے خاتمے لئی پاکستان دیاں کوششاں تعریف جوگ نیں۔ دہشت گردی خلاف جنگ وچ پاک فوج دا کردار مثالی اے۔ اوہناں دا کہنا سی کہ امریکا خطے دے امن لئی پاکستان نال تعاون جاری رکھے گا۔ آرمی چیف دا ایس موقعے اُتے کہنا سی کہ ملک بھر توں دہشت گردی دا خاتما یقینی بنایا جائے گا۔ آرمی چیف نے آکھیا کہ امریکا نال پاکستان دے فوجی تے دفاعی تعاون نوں اگانہ ودھایا جائے گا۔ اوہناں نے آکھیا پاکستان ہر قسم دی پراکسیز نوں رد کردا اے۔ پاکستان بغیر فرق دے دہشت گرداں خلاف کارروائی کر رہیا اے۔آرمی چیف دا ہور کہنا سی کہ اسیں اپنی زمین کسے خلاف ورتن نہیں دیاں گے۔
