مردان(پاکستان پوائنٹ نیوز17۔اپریل2017ء) مردان وچ عبدالولی خان یونیورسٹی دے پڑھیار مشال خان قتل کیس دے مرکزی ملزم وجاہت نے جرم قبول کر لیا۔ میڈیا رپورٹس دے مطابق مرکزی ملزم نے مجسٹریٹ ساہمنے اپنے اعترافی بیان وچ سارے واقعے دی ذمے واری یونیورسٹی انتظامیا اُتے پا دتی۔ ملزم نے دسیا کہ مینوں ایہ کم کرن لئی یونیورسٹی انتظامیا نے آکھیا سی۔
ملزم دا کہنا سی کہ مینوں یونیورسٹی انتظامیا نے 13اپریل نوں چیئرمین آفس بُلایا جتھے 15توں 20بندے موجود سن۔ چیئرمین آفس وچ انتظامیا توں وکھ لیکچرار ضیاءاللہ تے اسفند یار وی سن۔یونیورسٹی انتظامیا نے مینوں آکھیا کہ مشال تے اوہدے ساتھیاں نے توہین رسالت کیتی اے پر یونیورسٹی انتظامیا دے آکھن اُتے مشال تے اوہدے ساتھیاں خلاف تقریر کیتی۔
ملزم نے آکھیا کہ مینوں انتظامیا دی ایس سازش دا پتا ہوندا تے میں یونیورسٹی نہ آﺅندا۔ میں لوکاں نوں دسیا کہ مشال، عبداللہ تے زبیر نوں توہین کردے سُنیا۔ فہیم عالم نے میرے بیان دی لوکاں ساہمنے فوری گواہی دے دتی۔ اودوں تک سارے لوک چُپ سن پر ایس دوران سکیورٹی انچارج آیا۔ ملزم نے دسیا کہ سکیورٹی انچارج بلال نے آکھیا کہ جہنے مشال دی طرف داری کیتی اوہدے نال وی سختی نال نبڑیا جائے گا۔ سکیورٹی انچارج نے آکھیا کہ اوہ آپ مشال نوں مارے گا۔ ملزم نے آکھیا کہ جے میں اوس ویلے بیان نہ دیندا تے اکٹھے ہوئے پڑھیار واپس چلے جاندے۔ میرے بیان مگروں پڑھیار بھوتر گئے۔ ملزم دا کہنا سی کہ میں مشال خان بارے غلط بیانی کرن اُتے شرمندا اں۔
