راولپنڈی(پاکستان پوائنٹ نیوز17۔اپریل2017ء) پاک فوج دے شعبہ تعلقات عامہ آئی ایس پی آر دے ڈائریکٹر میجر جنرل آصف غفور نے آکھیا کہ لاہور توںبازیاب ہون والی ایم بی بی ایس دی پڑھیار نورین لغاری دے والد نے بازیابی لئی آرمی چیف جنرل قمر جاوید باجوہ نال رابطا کیتا سی۔ پیر نوں ڈی جی آئی ایس پی آر دی پریس کانفرنس دوران نورین لغاری دا ریکارڈ کیتا گیا ویڈیو پیغام وی چلایا گیا۔
اپنے پیغام بیان وچ نورین دا کہنا سی کہ اوہ حیدر آباد دی رہن والی اے تے اوہدا والد سندھ یونیورسٹی وچ کیمسٹری دا پروفیسر اے۔ لاہوروں گرفتار ہون والی میڈیکل دی پڑھیار دا ہور کہنا سی کہ اوہنوں کسے نے اغوا نہیں کیتا اوہ اپنی مرضی نال ایتھے آئی سی۔ نورین نے دسیا کہ علی دی شروع توں ای دہشت گردانہ کارروائیاں دی منصوبا بندی سی، جیویں کہ آپ مارو حملا کرنا تے سکیورٹی اہلکاراں نوں اغوا کرنا وغیرا۔
نورین نے دسیا کہ علی نال ابو فوجی ناں دا اک مُنڈا وی ملوث سی، اوہناں نوں کارروائیاں لئی پہلی اپریل نوں تنظیم نے سامان دتا ۔ سامان وچ آپ مارو جیکٹس، چار ہینڈ گرنیڈز تے کُجھ گولیاںشامل سن۔ نورین نے ہور دسیا کہ ایہناں آپ مارو جیکٹاں نال ایسٹر دے موقعے اُتے کسے چرچ اُتے حملا کرنا سی جہدے لئی مینوں ورتیا جانا سی پر ایس توں پہلے ای 14اپریل دی رات سکیورٹی فورسز نے ساڈے گھر چھاپا ماریا۔
