کراچی(پاکستان پوائنٹ نیوز15۔اپریل2017ء) کراچی دی عدالت وچ ڈاکٹر عاصم حسین خلاف دہشت گرداں نوں علاج دیاں سہولتاں دین دے حوالے نال کیس دی سنوائی ہوئی۔ ڈاکٹر عاصم حسین نے عدالت وچ علاج خاطر باہرلے ملک جان دی اجازت تے ای سی ایل توں ناں کڈھن دی درخاست دائر کیتی ہوئی سی جہنوں عدالت نے منظور کردے ہوئے اوہناں نوں باہرلے ملک جان دی اجازت دے دتی اے۔
عدالت نے ڈاکٹرعاصم حسین نوں 20لکھ رُپئے دے مچلکے جمع کروان دا حکم وی دتا۔ عدالت دے مطابق ڈاکٹر عاصم حسین نوں علاج خاطر دو ہفتیاں لئی باہرلے ملک جان دی اجازت دتی گئی اے۔ عدالت نے ڈاکٹر عاصم حسین دا ناں ای سی ایل وچ شامل کرن دا حکم ناما معطل کردے ہوئے پاسپورٹ دی واپسی لئی ڈاکٹر عاصم حسین نوں سندھ ہائی کورٹ نال رابطا کرن دا حکم دتا۔ میڈیا وسیلیاں دے مطابق ڈاکٹر عاصم حسین خلاف نیب وچ دو ریفرنسز دائر نیں جدکہ سندھ ہائی کورٹ وچ وی ڈاکٹر عاصم حسین دا مقدما سنوائی ہیٹھ اے۔
ایس لئی پاسپورٹ دی واپسی لئی ڈاکٹر عاصم حسین نوں سندھ ہائی کورٹ تے احتساب عدالت نال رابطا کرنا پئے گا۔ ڈاکٹر عاصم حسین احتساب عدالت تے سندھ ہائی کورٹ دی اجازت مگروں باہرلے ملک جا سکدے نیں۔ اے ٹی سی ولوں ڈاکٹر عاصم حسین نوں دو ہفتیاں لئی باہرلے ملک جان دی اجازت دتی گئی اے، جہدے مگروں ڈاکٹر عاصم ملک واپسی اُتے فیر اپنا پاسپورٹ عدالت وچ جمع کروان دے پابند ہون گے۔
