اسلام آباد(پاکستان پوائنٹ نیوز11۔اپریل2017ء) رکن قومی اسمبلی شاہ جہان مینگریو نے تجویر دتی اے کہ کیپٹن (ر) محمد صفدر نوں پارلیمنٹ ہاﺅس دی مسیت دا امام بننا چاہیدا۔ میڈیا رپورٹس دے مطابق قومی اسمبلی دی قائمہ کمیٹی برائے آئی ٹی دے اک اجلاس وچ گل بات کردے ہوئے نیشنل پیپلز پارٹی توں تعلق رکھن والے ایم این اے شاہ جہا مینگریو نے آکھیا کہ کیپٹن (ر) صفدر نوں اسلام بارے ڈاڈھی جانکاری اے ایس لئی اوہناں نوں پارلیمنٹ دی مسیت دا امام ہونا چاہیدا۔
ایہ ریمارکس اوس ویلے ویلے ساہمنے آئے جدوں کیپٹن (ر) صفدر نے گستاخانہ مواد تے سوشل میڈیا دی غیر ذمے وارانا ورتوں اُتے لمی تقریر کیتی۔ ذکر کیتی گئی کمیٹی دی صدارت کردے ہوئے کیپٹن (ر) صفدر نے آکھیا کہ اوہناں نے پارلیمنٹ وچ سوشل میڈیا اُتے گستاخانہ مواد بارے قرار داد جمع کروا دتی اے۔ اوہناں نے آکھیا کہ گستاخانہ مواد کھلارن پچھے اک منظم گروہ اے، ایس مافیا خلاف سخت ایکشن لین دی لوڑ اے۔
اوہناں نے آکھیا کہ خدا ایس حوالے نال قیامت دے دیہاڑ ساڈے کولوں پُچھے گا، میںسمجھنا واں کہ پاکستان ٹیلی کمیونیکیشن اتھارٹی ایس مسئلے نوں نبیڑن دی صلاحیت رکھدی اے تے پاکستان دیاں ساریاں خفیہ ایجنسیاں تے لوکائی ایس مسئلے اُتے اک نیں۔ اوہناں نے آکھیا کہ کئی لوکاں نے اوس جج نوں تنقید دا نشانا بنایا جہنے گستاخانہ مواد دا نوٹس لیا تے ایہ شکایت کیتی کہ جج نے عدالت دے کمرے نوں مسیت بنا دتا اے۔
اوہناں نے آکھیا کہ اجیہے لوک نہیں جاندے کہ پہلے عدالتاں مسجداں وچ لگدیاں سن تے اہم فیصلے اوتھے ہوندے سن۔ پی ٹی اے نوں جاننا چاہیدا کہ گستاخانہ مواد لئی فنڈنگ کتھوں آ رہی اے۔ آواز چُکنا ساڈی ذمے واری بندی اے کیونکہ ایہ جہاد اے تے اسیں اوہنوں جاری رکھاں گے۔ کیپٹن (ر) صفدر دے ریمارکس سن کے (ن) لیگ دی فرہانہ قمر دے اتھرو ڈِگ پئے۔ شاہ جہاں مینگرو نے آکھیا کہ ایس مہم پچھے ملک وچ ضرور کُجھ عناصر ہون گے اوہناں نے آکھیا کہ کیپٹن (ر) صفدر اسلام بارے ڈاڈھی جانکاری رکھدے نیں اوہناں نوں پارلیمنٹ دی مسیت دا امام مسجد ہونا چاہیدا۔
کیپٹن (ر) صفدر نے جواب وچ آکھیا کہ مینوں مسجد دا امام بنن اُتے فخر محسوس ہووے تے مینگرو نوں آکھیا کہ اوہ عہدے لئی اوہناں دا ناں دین۔ اوہناں نے آکھیا کہ یوٹیوب تے فیس بک سنے سوشل میڈیا بند نہیں ہونی چاہیدی بلکہ گستاخانہ مواد ہٹایا جانا چاہیدا۔ کمیٹی نے معاملے نوں اسلامی نظریاتی کونسل دے مشورے تے اسلامی ملکاں دے سفیراں ساہمنے ایس چُکن دی تجویز دتی۔
