اسلام آباد(پاکستان پوائنٹ نیوز11۔اپریل2017ء) ایف آئی اے نے اوہناں این جی اوز خلاف کارروائی شروع کر دتی اے جو سماجی رابطیاںدی ویب سائٹ اُتے گستاخانہ مواد دی پروموشن، فنڈنگ تے چھاپن وچ ملوث سن۔ وسیلیاں دے مطابق ایف آئی اے دے ڈپٹی ڈائریکٹر نعمان اشرف نے قومی اسمبلی دی قائمہ کمیٹی برائے انفارمیشن ٹیکنالوجی نوں بریفنگ دیندے ہوئے آکھیا کہ ایف آئی اے نے اوہناں چار بندیاں نوں گرفتار کر لیا اے جو مبینہ طور اُتے سوشل میڈیا اُتے گستاخانہ مواد نوں کھلارن وچ ملوث نیں۔
اوہناں لوکاں نوں جسمانی ریمانڈ اُتے پیش کر دتا گیا اے۔ ایف آئی اے تے ٹیلی کمیونیکیشن اتھارٹی نے قائمہ کمیٹی نوں سماجی رابطیاں دی ویب سائٹ اُتے کھلرے ہوئے گستاخ رسول اُتے مبنی مواد بارے بریفنگ دتی۔ ایف آئی اے حکام نے پارلیمنڑی پینل نوں بریفنگ دیندے ہوئے دسیا کہ ساریاں این جی جو ایس کم وچ ملوث نیں، خلاف کارروائی شروع کر دتی گئی اے پر اوہناں دے اجے ناں نہیں دسے گئے۔
اوہناں دا کہنا سی کہ گرفتار کیتے گئے بندیاں دا تعلق اسلام آباد، کراچی تے سرگودھا توں سی۔ کمیٹی چیئرمین دا کہنا سی کہ ایہ این جی اوز ایسٹ انڈیا کمپنی نال تعلق رکھدیاں نیں تے ایہناں خلاف کارروائی سخت کیتی جائے پر سماجی رابطیاں دی ویب سائٹس فیس بک تے یوٹیوٹ بند نہیں کیتی جائے گی۔اوہناں دا کہنا سی کہ سوشل میڈیا نوں گستاخانہ مواد کھلارن دی اجازت نہیں دتی جائے گی۔
