اسلام آباد (پاکستان پوائنٹ نیوز5۔اگست 2016ء) مسلم لیگ (ن) نے چیئرمین تحریک انصاف عمران خان دی نااہلی لئی ریفرنس سپیکر قومی اسمبلی سردار ایاز صادق دے دفتر جمع کروا دِتا۔ تفصیل دے مطابق جمعے نوں مسلم لیگ ن ولوں چیئرمین تحریک انصاف عمران خان دی نااہلی خلاف ریفرنس دانیال عزیز، طلال چوہددری تے مسلم لیگ (ن) دے ہور رہنماواں نے دایر کیتا۔ سپیکر سردار ایاز صادق نے ریفرنس لین دے بعد آکھیا کہ ریفرنس بارے فیصلا آئین تے قانون دا جائزا لین دے بعد ہی ہووے گا۔
ایس موقع اُتے مسلم لیگ ن دے رکن قومی اسمبلی طلال چوہدری نے میڈیا نال گل بات کردے ہوئے آکھیا کہ عمران خان نے اپنے اثاثیاں وچ آف شور کمپنیاں تے کاغذات نامزدگی لُکائے نیں تے پاناما پیپر وچ ناں آن دے بعد عمران خان نوں نااہل قرار دِتا جاوے۔ اوہناں نے آکھیا کہ عمران خان آرٹیکل 62 تے 63 اُتے پورا نہیں اُتردے ایس لئی کسے جھوٹھے بندے نوں اسمبلی وچ بیٹھن دا کوئی اختیار نہیں اے۔ جھوٹھ بولن اُتے عمران خان صادق تے امین نہیں رہے۔
