حمید آباد(پاکستان پوائنٹ نیوز31۔مارچ2017ء) غیر اعلانیہ لوڈشیڈنگ خلاف مسلم لیگ (ن) دے رکن صوبائی اسمبلی میر اظہار خان کھوسہ نے صحبت پور توںکوئٹہ تک پیدل لانگ مارچ کرن دا اعلان کر دتا۔ تفصیل دے مطابق جمعے دے دیہاڑے اپنی رہائش گاہ وچ میڈیا نال گل بات کردے ہوئے اوہناں دا کہنا سی کہ ایس ڈی او صحبت پور تے ایکسیئن واپڈا مِل مالکاں کولوں بھتہ لے کے شہریاں نوں بجلی نہیں دیندے۔
اوہناں دا کہنا سی کہ لوڈشیڈنگ خلاف اسمبلی وچ گل بات کیتی جائے گی جے ساڈی گل نہ سنی گئی تے لوکائی نال رلکے صحبت پور توں کوئٹہ تک پیدل لانگ مارچ کراں گے پر کرپٹ افسراں نوں کدی برداشت نہیں کیتا جائے گا۔ میر اظہار کھوسہ نے آکھیا کہ کنک دی فصل تیار اے ہر تھاں اُتے سنٹر بنے ہوئے نیں تاں جے نکے زمینداراں نوں اوہناں دی محنت دا پھل مل سکے۔ اوہناں نے آکھیا کہ آدم شماری وچ لوکاں نے چنگے طریقے نال ساتھ دتا اے۔
اوہناں دا کہنا سی کہ افغان مہاجرین دے حق وچ اسیں آں پر نواب لشکری رئیسانی دے جرگے وچ کسے مجبوری دی وجہ توں رلت نہیں کیتی۔ میر اظہار کھوسہ نے آکھیا کہ سی پیک توں سانوں روڈ ملے گا، گوادر وچ اسیں وزیر اعظم توں گزارش کیتی تے اوہناں نے سانوں یقین دوایا اے کہ تہاڈے علاقے نوں وی اوہدے وچ شامل کیتا جائے گا۔
