اسلام آباد(پاکستان پوائنٹ نیوز29۔مارچ2017ء) تحریک انصاف دے چیئرمین عمران خان نے ڈاکٹر عاصم، ایان علی دی رہائی تے شرجیل میمن دی واپسی نوں ڈیل قرار دے دتا، پاناما کیس توں بچن لئی وی نواز تے آصف وچ ڈیل ہو گئی اے، ڈاکٹر عاصم اُتے 480ارب رُپئے دی کرپشن دا الزام اے۔ ضمانت اُتے چپ نہیں رہ سکدے، قوم تھک گئی ، دعا اے کہ پاناما کیس دا فیصلا چھیتی آ جائے۔
تفصیل دے مطابق اج میڈیا نال گل بات کردے ہوئے عمران خان دا کہنا سی کہ نواز شریف نال ڈیل دے تحت ای آصف زرداری واپس آئے نیں۔ نواز شریف سندھ وچ جدکہ آصف زرداری لاہور وچ بِہ گئے۔ ایہ اویں ای ہو رہیا اے جو الیکشن 2013توں پہلے (ن) لیگ لئی فرینڈلی اپوزیشن بنی رہی۔فیر الیکشن مہم وچ نواز شریف نے آکھیا کہ زرداری دا ڈھڈ پاڑ کے پیسہ کڈھاں گا۔ مزے دی گل اے کہ آصف علی زرداری 2013دے الیکشن نوں ہن آر او دا الیکشن قرار دے رہے نیں پر جدوں اسیں دھرنا دتا تے جمہوریت خطرے وچ پے گئی۔
اوہناں دا کہنا سی کہ دوویں بھرا اکٹھے ہو گئے سن۔ عمران خان نے آکھیا کہ آصف علی زرداری تے نواز شریف منی لانڈرنگ وچ ملوث نیں۔ ایس لئی دوواں دے مفادات اک نیں، دوویں اک دوجے نوں نقصان نہیں پہنچان دین گے۔ عمران خان دا کہنا سی کہ دوواں وچکار نوار کشتی ڈیل دے تحت ہو رہی اے۔ چیئرمین پی ٹی آئی نے آکھیاکہ پاناما توں بچن لئی وی دوواں دی ڈیل ہو گئی اے، دھرنے دے دوران وی آصف زرداری نوں رائے ونڈ کھانے اُتے بلایا گیا۔
اوہناں نے آکھیا کہ ڈاکٹر عاصم اُتے 480ارب رُپئے دی کرپشن دا الزام اے۔ ضمانت اُتے چُپ نہیں رہ سکدے۔ اوہناں دا کہنا سی کہ حامد سعید کاظمی وی حج کرپشن کیس وچ بری ہو گئے نیں۔ عمران خان دا ہور کہنا سی کہ وزیر اعظم ملک نوں تباہ کر رہیا اے۔ کرپٹ وزیر اعظم دی موجودگی وچ ادارے ترقی نہیں کر سکدے۔
