لودھراں(پاکستان پوائنٹ نیوز28۔مارچ2017ء) وزیر اعلا پنجاب میاں شہباز شریف نے آکھیا اے کہ مسلم لیگ (ن) آن والے الیکشن وچ مخالف جماعتاں دا صفایا کر دیوے گی، پیپلز پارٹی پہلے کراچی دا کوڑا صاف کرے فیر پنجاب دی گل کرے، خان صاحب نے میٹرو دے فائدے ویکھ کے 4سال مگروں پشاور وچ میٹرو بس بنان دا فیصلا کیتا۔ تفصیل دے مطابق اج لودھراں وچ جلسے نال خطاب کردے ہوئے وزیر اعلا پنجاب میاں شہباز شریف دا کہنا سی کہ 96کلو میٹر لودھراں خانیوال منصوبے اُتے 22ارب رُپئے لاگت آئے گی۔
جہنوں 12مہینیاں وچ پورا کیتا جائے گا۔ اوہناں نے آکھیا کہ اک جماعت دے سربراہ نے آکھیا کہ پنجاب نوں چمکاواں گے، میں اوہناں نوں کہنا چاہنا واں کہ اوہ پہلے کراچی دا کوڑا صاف کرن فیر پنجاب دی گل کرن۔ وزیراعلا نے آکھیا کہ میٹرو بس دے فائدے ویکھدیاں ہویاں پشاور وچ وی میٹرو بس بنائی جا رہی اے۔ شہباز شریف دا کہنا سی کہ خان صاحب میٹرو بس نوں جنگلا بس نہ آکھن، میں وی پشاور والی میٹرو نوں جنگلا نہیں آکھاں گا کیونکہ ایہ عزت نال سفر کرن والے لوکاں دی توہین ہووے گی۔
اوہناں نے آکھیا کہ پنجاب وچ ترقیاتی کماں دا جال وچھا دتا اے جدکہ پہلے جنوبی پنجاب توں وزیر اعلا تے گورنر وی بنے پر اوہناں نے کُجھ نہ کیتا۔ وزیر اعلا پنجاب دا ہور کہنا سی کہ اج ملتان اندر 28ارب دی لاگت نال میٹرو بس چل رہی اے۔
