لاہور(پاکستان پوائنٹ نیوز27۔مارچ2017ء) وزیرا عظم میاں نواز شریف نے آکھیا اے کہ اسیں ملک اندر موجود دہشت گردی دا لک بنھ دتا، سی پیک دا فائدا پورے ملک نوں پہنچ رہیا اے، اجے لوڈشیڈنگ گھٹ ہوئی اے، پر 2018وچ بجلی دی لوڈشیڈنگ بالکل ختم کر دیاں گے، حیدر آباد دے لوکاں لئی ہیلتھ کارڈ دین، مہران ایکسپریس چلان، سوئی گیس، میٹرو بس تے بین الاقوامی ائر پورٹ، نیونیورسٹی بنان دا اعلان۔
تفصیل دے مطابق اج حیدر آباد وچ مسلم لیگ (ن) دے ورکرز کنونشن نال خطاب کردے ہوئے وزیر اعظم نواز شریف دا کہنا سی کہ لوکائی دا ایہ جوش جذبہ پنجاب، خیبر پختونخوا، ٹھٹھہ وچ وی ویکھ چکیا واں تے اج ایتھے وی اوہدی جوش جذبہ مثالی اے۔ اوہناں نے آکھیا کہ پاکستان بدل رہیا اے۔ پاکستان اج نواں پاکستان بن رہیا اے۔ 2013وچ پاکستان دا مَندا حال سی کیتے وی سکون نہیں سی پر اسیں مسائل حل کرن لئی کم شروع کیتا۔
پر اللہ دے کرم نال اسیں دہشت گردی دا لک بنھ دتا۔ 2013وچ کراچی دہشت گردی دا شکار سی۔ پر اج کراچی وچ امن اے۔ لوک کاروبار کر رہے نیں، لوک ڈرے نہیں نیں۔ بلوچستان وچ وی دہشت گردی دا راج سی پر اج بلوچستان وچ تیزی نال ترقی ہو رہی اے۔ سی پیک دا فائدا پورے ملک نوں پہنچ رہیا اے۔ اوہناں نے آکھیا کہ اوہ دن دور نہیں جدوں پاسکتان توں جہالت تے غربت دا خاتمہ ہووے گا۔
تعلیم عام ہووے گی، تھاں تھاں یونیورسٹیاں بنن گیاں۔ حیدر آباد وی اوہناں شہراں وچ شامل ہووے گا جتھے یونیورسٹیاں بن گیاں، انڈسٹریاں تے کارخانے بنن گے۔ ترقی آئے گی۔ وزیر اعظم دا کہنا سی کہ مشرف دی حکومت رہی فیر پیپلز پارٹی دی 2013تک حکومت رہی پر اوس زمانے وچ لوکاں نوں ایہ سہولتاں کیوں نہیں دتیاں گئیاں؟ ہیلتھ کارڈ کیوں نہ دتے گئے؟ اوہناں نے آکھیا کہ کراچی وچ کوڑے دے ڈھیر لگے ہوئے نیں۔
