اسلام آباد(پاکستان پوائنٹ نیوز27۔مارچ2017ء) محسن پاکستان ڈاکٹر عبدالقدیر خان نے آکھیا اے کہ میں ملک لئی بہت کُجھ کر سکدا سی پر حکمراناں نے روک دتا جدکہ ایٹمی طاقت بنن دا سہرا ذوالفقار علی بھٹو دے سر جاندا اے۔تفصیل دے مطابق اک تقریب نال خطاب کردے ہوئے ڈاکٹر عبدالقدیر خان نے آکھیا کہ ذوالفقار علی بھٹو بہت وڈے محب وطن سن، ایٹمی طاقت بنن دا سہرا بھٹو دے سر جاندا اے، جہناں نے میرے جہے نوجوان اُتے بھروسہ کیتا۔
اوہناں دا کہنا سی کہ اسیں ایٹم بم اُتے 1974وچ تے میزائل ٹیکنالوجی اُتے کم بینظیر بھٹو دے دور اندر شروع کیتا تے گھٹ وسائل ہون مگروں وی ملک نوں ایٹمی طاقت بنایا۔ اوہناں دا کہنا سی کہ جنرل ضیاءالحق تے فیر سابق صدر غلام اسحاق خان نوں تحریری طور اُتے دسیا کہ اسیں ہفتے دے نوٹس اُتے ایٹمی بم دا تجربا کر سکدے آں، بھارت نے ایٹمی دھماکے کیتے تے حکمراناں اُتے واضح کر دتا سی کہ برابر دا جواب دینا ضروری اے۔
ڈاکٹر عبدالقدیر خان نے آکھیا کہ میں ملک لئی بہت کُجھ کر سکدا سی پر حکمراناں نے روک لیا۔ اوہناں دا کہنا سی کہ میں ملک اندر سستی آٹو موبائل انڈسٹری لان دی پیشکش کیتی پر اوہنوں رد کر دتا گیا،پرویز مشرف نے غیر ملکیاں دے آکھن اُتے مینوں ہٹایا، میرے اُتے غلط الزام لائے گئے، میں حکمراناں توں کدی کوئی زمین یاں پیسہ نہیں لیا۔ اوہناں دا کہنا سی کہ میں اج وی اپنا گزارا ہالینڈ وچ کم دوران کیتی گئی بچت نال کرنا واں، ایس حوالے نال میرے کول ساریاں رسیداں موجود نیں۔
