اسلام آباد(پاکستان پوائنٹ نیوز25۔مارچ2017ء) پاکستانی حکومت نے سابق آرمی چیف جنرل (ر) راحیل شریف نوں سعودی عسکری اتحاد دی سربراہی دی اجازت دے دتی۔ تفصیل دے مطابق وفاقی وزیر دفاع خواجا آصف دا کہنا سی کہ سعودی حکومت نے ایس سلسلے وچ پاکستانی حکومت کولوں تحریری اجازت منگی سی جہدے بارے پاکستان نے سعودی عرب نوں تحریری طور اُتے دس دتا اے کہ پاکستانی نوں ایس سلسلے وچ کوئی اعتراض نہیں اے۔
نجی ٹی وی چینل دے پروگرام وچ گل بات دوران اوہناں نے دسیا کہ سعودی عسکری اتحاد بارے صرف رسمی کارروائی باقی اے۔ رسمی طور اُتے راحیل شریف دے سعودی عسکری اتحاد دی سربراہی دے سارے معاملات طے نیں۔ خواجا آصف دا کہنا سی کہ اجے تک جنرل (ر) راحیل شریف ولوں کوئی درخاست نہیں ملی۔ راحیل شریف دا اسلامی فوجیاں دی قیادت سنبھالنا ذاتی نہیں بلکہ دو ملکاں دیاں حکومتاں دا معاملا اے۔ راحیل شریف سعودی اتحاد دا فوجی ڈھانچا ترتیب دین گے۔ اوہناں نے ہور دسیا کہ رکن ملکاں دی ایڈوائزری کونسل دا اجلاس مئی وچ سعودی عرب اندر ہون دی امید اے۔
