اسلام آباد(پاکستان پوائنٹ نیوز23۔مارچ2017ء) امن و امان دی صورتحال نوں مُکھ رکھدے ہوئے کئی تھاواں اُتے سکیورٹی سخت کر دِتی گئی پر ائر پورٹس اُتے سکیورٹی سٹاف دی ای کمی دا انکشاف ہویا اے، پاکستان وچ مجموعی طور اُتے 42ائر پورٹ نیں جدکہ لوڑ دے اُلٹ ادھی گنتی وچ سٹاف موجود اے۔ میڈیا رپورٹ دے مطابق ملک دے 42ائر پورٹس اُتے ائر سکیورٹی سٹاف (اے ایس ایف) نوں تقریبن 13559اہلکاراں دی کمی دا ساہمنا اے جدکہ لوڑ دے مطابق 24226اہلکار ہونے چاہیدے۔
اہلکاراں دی سبھ توں بُہتی کمی لاہور دے علامہ اقبال انٹرنیشنل ائر پورٹ اُتے اے جتھے ہور 1026اہلکاراں دی لوڑ اے جدکہ ایس ویلے 2577بندیاں دی لوڑ دے اُلٹ مختلف پوسٹاں اُتے صرف 1551بندے کم کر رہے نیں۔ اے ایس ایف ہیڈ کوارٹر کراچی وچ 1618 اہلکار جدکہ مختلف ائر پورٹس اُتے ریجنل کمانڈرز دیاں 194پوسٹاں خالی پئیاں نیں۔رپورٹ دے مطابق سہون شریف، رحیم یار خان تے ڈیرہ غازی خان ائر پورٹ اُتے 164بندیاں دی تعیناتی دی گنجائش اے پر ائر پورٹ اندر یاں باہر کوئی اہلکار تعینات نہیں کیتا گیا۔
پشاور ائر پورٹ اُتے 593، فیصل آباد923، کوئٹہ 810 تے ملتان ائر پورٹ اُتے 553اہلکاراں دی کمی اے۔ ایسے طرحاں پاک چین اقتصادی راہداری منصوبے دے تحت ہور ودھوتری پان والے گوادر ائر پورٹ اُتے 479اہلکاراں دی کمی اے۔
