شمالی وزیرستان(پاکستان پوائنٹ نیوز23۔مارچ2017ء) پاکستان دیہاڑ دے موقعے اُتے اج دنیا بھر وچ امن و استحکام دا واضح پیغام اوس ویلے گیا جدوں شمالی وزیرستان وچ پہلی وار’ پاکستان دیہاڑ ‘دیاں تقریباں دا آہر کیتا گیا۔ تفصیل دے مطابق شمالی علاقیاں وچ دہشت گرداں خلاف کامیاب آپریشن ’ضرب عضب‘ مگروں پہلی وار وزیرستان وچ پاکستان دیہاڑ منایا گیا۔
شمالی وزیرستان وچ میران شاہ یونس خان سپورٹس کمپلیکس وچ پاکستان دیہاڑ دی وڈی تقریب دا آہر کیتا گیا۔ تقریب اندر وڈی گنتی وچ لوکاں نے رلت کیتی۔ تقریب وچ کرکٹ میچ توں وکھ ٹیبلوز، قومی نغمے تے علاقائی رقص وی پیش کیتا گیا۔ واضح رہوے کہ ’ضرب عضب‘ توں پہلے شمالی وزیرستان دے علاقے دہشت گردی دا گڑھ سن پر پاک فوج تے بہادر قبائلی علاقیاں دی لوکائی دیاں قربانیاں پاروں ایہناں علاقیاں وچ زندگی دیاں رونقاں بحال ہونا شروع ہو گئیاں نیں۔ کامیاب آپریشن پاروں قبائلیاں نے اج پاکستان دیہاڑ منا کے امن دا پیغام دِتا اے۔
