اسلام آباد(پاکستان پوائنٹ نیوز21۔مارچ2017ء) وزیر اعظم میاں محمد نواز شریف دی صدارت ہیٹھ پارلیمانی پارٹی دا اجلاس ہویا۔ اجلاس وچ ملکی سیاسی صورتحال سنے ہور معاملات اُتے وی غور کیتا گیا۔ وسیلیاں نے دسیا کہ اجلاس وچ وزیر اعظم نواز شریف دا کہنا سی کہ موجودا دور کھٹن اے پر فیر وی چیلنجاں دا بھرپور ساہمنا کیتا۔ اوہناں نے آکھیا کہ ایہ 1999والا دور نہیں اے سانوں پچھلے چار ورھیاں توں بہت محنت کرنی پئی۔
وزیر اعظم نے رلتیاں نوں ہدایت کیتی کہ اپنی پارلیمانی ذمے وار پوری کرن لئی اج پارلیمنٹ ضرور جاﺅ۔ وزیر اعظم نے آکھیا کہ پرویز مشرف نے مینوں پیغام گھلیا کہ اوہ معاملات طے کرن وچ دلچسپی رکھدے نیں پر میں انڈر ہینڈ ڈیل کرن توں انکار کر دِتا۔ اوہناں دا کہنا سی کہ 2007وچ وی پرویز مشرف انڈر ہینڈ ڈیل کرنا چاہندا سی، اسیں مَندے حالات وچ پاکستان توں گئے ساں، اسیں جانا نہیں چاہندے ساں پر سانوں زبردستی گھلیا گیا پر اسیں اودوں وی واپس آنا چاہندے ساں، سانوں آن نہیں دتا گیا۔ اوہناں نے آکھیا کہ میں خفیہ ڈیل اُتے یقین نہیں رکھدا ایس لئی اللہ نے مینوں کامیاب کیتا اے۔ اج مشرف چاہن مگروں وی پاکستان نہیں آ سکدا ایہو مکافات عمل اے۔
