پشاور(پاکستان پوائنٹ نیوز18۔مارچ2017ء) سپیکر خیبر پختونخوا اسمبلی اسد قیصر نے اپنے اُتے لگن والے کرپشن دے الزاماں نوں رد کر دِتا ۔ تفصیل دے مطابق پشاور وچ پریس کانفرنس کرد ے ہوئے اسد قیصر نے اپنی جائیداداں دیاں تفصیلاں دَسدے ہوئے آکھیا کہ 2009وچ 5کینال زمین دو قسطاں وچ مُل لئی۔ آکھیا گیا کہ میرا 35کروڑ دا بنگلا اے۔ اوہناں نے آکھیا کہ جو وی میرا 35کروڑ دا بنگلا لبھے گا میں اوہنوں گفٹ کر دیواں گا۔
اوہناں دا کہنا سی کہ میں آپ کرائے دے گھر وچ رہنا واں۔ میری زمین بے نامی نہیں الیکشن کمیشن وچ ڈکلیئرڈ اے، میں 11لکھ رُپئے ویلتھ ٹیکس دتا اے میرا بھرا بنی گالا وچ کرائے دے بنگلے اُتے رہندا اے۔ غیر قانونی بھرتیاں دے الزاماں نوں رد کرد ے ہوئے اوہناں نے آکھیا کہ سینئر پوزیشن اُتے تقرریاں لئی اشتہار دِتا گیا۔ این ٹی ایس راہیں امتحان وی لِتا گیا۔ٹوٹل 7بھرتیاں ہوئیاں جہناں وچوں 38فور کلاس سنے ہور ملازماں تے ریٹائر کوٹا دیاں نیں۔ اوہناں نے آکھیا کہ اسمبلی وچ پہلی وار این ٹی ایس ٹیسٹ راہیں بھرتیاں کیتیاں گئیاں۔
