اسلام آباد(پاکستان پوائنٹ نیوز18۔مارچ2017ء) سوشل میڈیا اُتے گستاخانہ مواد دی تشہیر بارے ایف آئی اے نے اسلام آباد ہائی کورٹ وچ اپنے بیان وچ آکھیا اے کہ گستاخانہ مواد دی تشہیر کرن والے سوشل میڈیا ورتیندڑ، اوہناں دے سہولت کار تے مبینہ طور اُتے اوہناں دے پچھے موجود این جی اوز بارے معلومات نہیں لِتیاں جا سکیاں۔ جہدے اُتے اسلام آباد ہائی کورٹ نے خفگی دا وکھالا کردے ہوئے ایف آئی اے نوں حکم دِتا کہ اوہ کہانیاں سُنان دی بجائے اوہناں خلاف کارروائیاں تے تحقیقات بارے دسے۔
عدالت نے نجی ٹی وی چینلز دے مارننگ شوز اُتے چلن والے مواد دا جائزا لین لئی اک کمیٹی وی بنان دا حکم دِتا۔ اسلام آباد ہائی کورٹ دے جسٹس صدیقی نے ایڈووکیٹ جنرل نوں تحقیقات وچ آئی ایس آئی توں مدد لین دی وی ہدایت کیتی۔ جسٹس شوکت عزیز صدیقی نے ریمارکس دِتے کہ حضرت محمد دی ذات مبارک سارے مسلماناں لئی مقدس اے ایس لئی کوئی وی ایہدے اُتے سمجھوتا نہیں کر سکدا۔
سنوائی دوران ایف آئی اے دے ڈائریکٹر نے دسیا کہ سوشل میڈیا اُتے گستاخانہ مواد دی تشہیر کرن والے 70بندیاں دی شناخت ہو گئی اے پر اوہناں وچوں کئی باہرلے ملک رہ رہے نیں۔ ایف آئی اے ڈائریکٹر نے ہور دسیا کہ ایف آئی اے ایس سلسلے وچ انٹرپول تے فیس بک انتظامیا نال رابطے وچ اے، ایف آئی اے فیس بک انتظامیا ولوں کسے جواب دی اُڈیک وچ اے۔
