لاہور(پاکستان پوائنٹ نیوز16۔مارچ2017ء) لاہور ہائی کورٹ دے مسٹر جسٹس عاطر محمود نے وزیر اعلا پنجاب خلاف توہین عدالت دی درخاست نوں ناقابل سنوائی قرار دے کے رَد کر دِتا پر فاضل جج نے وزیر اعلا پنجاب میاں شہباز شریف ولوں عوامی جلسے وچ ججاں دے احتساب دے حوالے نال بیان دین اُتے خفگی دا وکھالا کردے ہوئے ریمارکس دِتے کہ ججاں دے احتساب دا طریقا کار موجود اے کوئی عدالت نوں احتساب دے طریقے نہ دَسے۔
فاضل جج نے ہور آکھیا کہ وزیر اعلا نوں عوامی جلسیاں وچ ججاں دے حوالے نال بیان دین توں پرہیز کرنا چاہیدا پر وزیر اعلا دا بیان توہین عدالت دے زمرے وچ وچ نہیں آﺅندا۔یاد رہوے کہ عدالت وچ مقامی شہری محمود اختر نے درخاست دائر کیتی کہ وزیر اعلا پنجاب نے سوانیاں دے عالمی دیہاڑ دے موقع اُتے منعقد کیتی گئی تقریب وچ ججاں نوں آپ احتسابی کرن دے حوالے نال بیان دِتا تے اوہناں دا ایہ بیان عدالتاں اُتے دباءپان دے برابر اے۔ ایس لئی عدالت وزیر اعلا پنجاب خلاف توہین عدالت دی کارروائی کرے۔
