لاہور(پاکستان پوائنٹ نیوز15۔مارچ2017ء) مسلم لیگ (ن) نے سپریم کورٹ وچ وزیر اعظم خلاف پاناما کیس دے فیصلے اُتے فوری الیکشن کروان دا فیصلا کر لیا اے، ایہ فیصلا وزیر اعظم میاں محمد نواز شریف دی صدارت ہیٹھ پارٹی دے اعلا سطحی اجلاس وچ کیتا گیا اے۔ وسیلیاں دے مطابق مسلم لیگ (ن) دے رہنماواں نے وزیر اعظم نواز شریف نوں مشورا دِتا اے کہ پاناما دا فیصلا وزیر اعظم خلاف آیا تے فوری عوامی عدالت نال رابطا کیتا جائے۔
جہدے تحت فوری الیکشن دا اعلان کر دِتا جائے۔ ایس توں وکھ مسلم لیگ(ن) دی اعلا قیادت نے آن والے وزیر اعظم لئی مریم نواز نوں انتخابی میدان وچ لاہن دا فیصلا وی کیتا اے۔ یاد رہوے کہ وزیر اعظم میاں محمد نواز شریف نے پچھلے دیہاڑے دورا کراچی دے موقع اُتے گورنر ہاﺅس وچ وی پارٹی رہنماواں دے اجلاس دی صدارت کیتی اجلاس وچ سندھ وچ پارٹی دیاں سیاسی سرگرمیاں دا جائزا لِتا گیا۔
وزیر اعظم نواز شریف نے سندھ وچ آن والے الیکشن دی بھرپور تیاری دی ہدایت وی کیتی جدکہ مسلم لیگ (ن) نوں سندھ وچ مضبوط تے فعال بنان لئی رُسے ہوئے لیگی کارکناں نوں منان تے عوامی جلسے کرن لئی لائحہ عمل طے کیتا گیا۔ (ن) لیگی رہنماواں دے سندھ وچ انتخابی جلسیاں دے لائحہ عمل دے تحت پہلے مرحلے وچ پارٹی دے اہم رہنما سندھ دے مختلف علاقیاں دے دوے کرن گے جدکہ دوجے مرحلے وچ وزیر اعظم نواز شریف عوامی جلسیاں نال خطاب کرن گے۔
