لاہور(پاکستان پوائنٹ نیوز14۔مارچ2017ء) صوبائی وزیر قانون رانا ثناءاللہ خان نے آکھیا اے کہ حسین حقانی دی گل بات دے تانے بانے اوس ویلے دے وزیر اعظم یوسف رضا گیلانی نال ملدے نیں، حسین حقانی دیاں گلاں اجیہیاں نیں جہناں نوں کوڑے دی ٹوکری وچ نہیں سُٹیا جا سکدا، حسین حقانی نے جو گل کیتی اے اوہ اوہدیاںپہلیاں گلاں دا تسلسل اے اوہ حب الوطنی خلاف آکھے یاںنہ آکھے اکوگل اے، بلاول بھٹو ملتان دے سٹیڈیم وچ جلسہ کرنا چاہن تے اجازت مل سکدی اے پر کُھلے میدان وچ جلسے دی اجازت اُتے سکیورٹی خدشے نیں، شیخ رشید دیاں پیشنگوئیاں اُتے اوہناں نوں شرم آنی چاہیدی۔
تفصیل دے مطابق پنجاب اسمبلی دے احاطے وچ میڈیا نال گل بات کردے ہوئے رانا ثناءاللہ خان دا کہنا سی کہ مراد سعید تے جاوید لطیف نوں الیکشن کمیشن ای سزا دے سکدا اے جے پی ٹی آئی چاہندی اے تے جاوید لطیف خلاف ریفرنس دائر کرے، جے پی ٹی آئی ریفرنس دائر کرے گی تے اجیہا ریفرنس اسیں وی مراد سعید خلاف لیا سکدے آں، جاوید لطیف دی سزا توں بہتی مراد سعید دی سزا ہونی چاہیدی۔
اوہناں نے آکھیا کہ دوجیاں دی عزت اُچھالنا تے سکینڈل والی گل بات تے عمران خان وی کردے نیں، جدوں جاوید لطیف نے باقاعدا معافی منگی لئی تے پی ٹی آئی نوں اپنا ظرف وکھانا چاہیدا۔ اک سوال دے جواب وچ اوہناں نے آکھیا کہ پرویز مشرف تے باقی ریلوکٹا پھٹیچر سیاستدان 25توں 30سال تک خاب ویکھدے رہے کہ نواز شریف دی حکومت ختم ہو جائے گی، نواز شریف دی سیاست اوس ویلے تک ختم نہیں ہو سکدی جدوں تک لوکاں دی محبت قائم اے۔
اوہناں نے آکھیا کہ آدم شماری دی بنیاد اُتے وسائل نوں بہتر انداز نال یوٹلائز کرن دا موقع ملدا اے۔ اوہناں نے آکھیا کہ شیخ رشید دیاں پیشنگوئیاں اُتے اوہناں نوں شرم آنی چاہیدی۔ اوہناں دا کہنا سی کہ ہن شیخ رشید وی سمجھ گئے کہ الیکشن 2018وچ ای ہون گے۔اوہناں دا کہنا سی کہ بلاول بھٹو ملتان دے سٹیڈیم وچ جلسہ کرنا چاہن تے اجازت مل سکدی اے پر کُھلے میدان وچ جلسے دی اجازت اُتے سکیورٹی خدشے نیں۔
