گوجرانوالا(پاکستان پوائنٹ نیوز14۔مارچ2017ء) عوامی مسلم لیگ دے سربراہ شیخ رشید احمد نے الزام لایا اے کہ ن لیگ تے پیپلز پارٹی دوویں اک ای نیں جہناں نے فوجی عدالتاں خلاف ایکا کر لیا اے، زرداری نے 4وار پاکستان سپر لیگ فائنل وچ رلت توں روکیا، زرداری تے گیلانی نے غدار حسین حقانی نوں پناہ دِتی، میمو گیٹ وچ سارےاں سیاسی جماعتاں ملوث سن، نواز شریف حسین حقانی کیس کھولن، پاناما اُتے عدالتی فیصلا قبول کراں گے پر جِت ساڈی ہو گئی اے، ن لیگ یاں قانون دوواں وچوں اک دا تابوت نکلے گا۔
ایہناں خیالاں دا اظہار اوہناں نے منگل دے دیہاڑے گوجرانوالا وچ پریس کانفرنس کردے ہوئے کیتا، شیخ رشید احمد نے آکھیا کہ حکومت ناقص کارکردگی تے کرپشن پاروں مکمل طور اُتے ناکام ہو گئی اے، لوک حکومتی کرپشن توں تنگ آ گئے نیں ایتھوں تک کہ ن لیگ دے اپنے لوک وی کرپشن اُتے مونہ لُکاندے پھردے نیں، حکومت صرف اپنی ذات دے دوالے گھم رہی اے تے پیپلز پارٹی وی اوہناں دے نال ای اے پر ایہناں دے دن گِنے جا چکے نیں، پاناما کیس سنے دو اہم فیصلے آن والے کُجھ دِناں وچ آن والے نیں تے باقی کیساں دے فیصلے وی چھیتی آ جان گے۔
اسیں امید کردے آں کہ فیصلا انصاف اُتے مبنی آ ئے گا۔ ہن کوئی گنجائش نہیں پاناما کیس وچ ن لیگ یاں قانون دوواں وچوں اک دا تابوت نکلے گا، عدالت پاناما اُتے کمیشن بنان سنے جو وی فیصلا کرے گی اوہنوں قبول کراں گے پر ایس کیس وچ جِت ساڈی ہو گئی اے کُجھ پتا نہیں کہ تحریک انصاف پاناما کیس دے فیصلے اُتے کیہ سٹینڈ لووے گی۔ اوہناں نے آکھیا کہ (ن) لیگ والے دعوے کر رہے نیں کہ وزیر اعظم پاناما کیس دا فیصلا اپنے خلاف آن اُتے اپیل نہیں کرن گے حالانکہ حقیقت ایہ اے کہ پاناما کیس مقدمے دے فیصلے خلاف اپیل ہو ای نہیں سکدی ایس لئی انج دے حکومتی دعوے مکر نیں کیونکہ اوہناں نوں اپنا مقدر صاف وکھالی دے رہیا اے تے سانوں وی یقین اے کہ پانامادے فیصلے نال حکومتی جھوٹھ ساہمنے آ جائے گا۔
