لاہور(پاکستان پوائنٹ نیوز02۔مارچ2017ء) تحریک انصاف دے چیئرمین عمران خان نے آکھیا اے کہ سخت سکیورٹی وچ عراق تے شام اندر وی میچ ہو سکدا اے۔ تفصیل دے مطابق میڈیا نال گل بات کرد ے ہوئے عمران خان نے آکھیا کہ پی ایس ایل دے فائنل اک میچ لئی 30ہزار سکیورٹی اہلکار تعینات کیتے جا رہے نیں۔ سخت سکیورٹی دے عالم وچ سڑکاں تے دُکاناں بند کروان نال امن دا کیہ پیغام جائے گا۔
اوہناں نے آکھیا کہ ایس طرحاں دی سکیورٹی وچ عراق تے شام وچ وی میچ ہوسکدا اے۔ ایس توں وکھ اک تقریب نال خطاب وچ عمران خان نے آکھیا کہ پاکستان وچ بے دردی نال درخت وڈھے گئے۔ خیبر پختونخوا وچ ساڈی حکومت آن تک 100ارب درخت وڈھے جا چکے سن۔اوہناں دا کہنا سی کہ خیبرپختونخوا وچ 75کروڑ درخت لائے نیں، اسیں 10چھانگا مانگا جنگل اُگائے نیں۔ پہاڑی علاقیاں وچ درخت اُگان نال 5لکھ لوکاں نوں روزگار ملیا۔ عمران خان دا کہنا سی کہ خیبرپختونخوا لیڈر شپ دی ایس کوشش دا آن والے دِناں وچ لوکائی نوں فائدا ہووے گا، خیبر پختونخوا لیڈر شپ نے ٹمبر مافیا دا مقابلا کیتا۔
