کراچی(پاکستان پوائنٹ نیوز25۔فروری2017ء) سٹیٹ بنک ولوں مخصوص شیواں دی درآمد اُتے 100فیصد کیش مارجن جمع کران دی شرط لان مگروں موبائل فون، سگریٹ، ہوم اپلائسز، جیولری، کاسمیٹکس، اسلحہ تے ہور شیواں مہنگیاں ہون دا امکان اے۔ تفصیل دے مطابق سٹیٹ بنک آف پاکستان نے بنک گارنٹی ختم کردے ہوئے مخصوص شیواں باہرلے ملک توں پاکستان منگوان اُتے 100فیصد کیش مارجن جمع کران دی شرط لا دِتی اے۔
سٹیٹ بنک نے اچانک ایہ حکم ناما جاری کیتا اے جہدے تحت موبائل فون، سگریٹ، جیولری، کاسمیٹکس، الیکٹرک آئٹمز، ہوم اپلائٹس، آرمز اینڈ ایمونیشن تے ہور شیواں درآمد کرن والیاں نوں سو فیصد کیش مارج بنک وچ جمع کروانا پئے گا۔ 100فیصد کیش مارجن دا مطلب ایہ اے کہ جِنی قیت دیاں شیواں باہرلے ملک توں ایتھے منگوائیاں جان گیاں اونے ای پیسے سٹیٹ بنک وچ جمع کروانے پین گے۔
ایس توں پہلے ایہ قانون سی کہ امپورٹرز شیواں درآمد کرن اُتے بنک گارنٹی دِتی جاندی سی جہناں عام طور اُتے بنک گارنٹی وچ آکھیا جاندا اے، امپورٹرآہستہ آہستہ اوہدی ادائیگی کردا رہندا سی پر ہن انج نہیں ہووے گا ۔ ایس حوالے نال تاجراں دا کہنا اے کہ ایس حکم نامامے راہیں ساڈا زیادا سرمایا ایس کم وچ پھس رہیا اے جہدا سِدھا اثر قیمت اُتے پئے گا ، نتیجے وچ ایہ شیواں مہنگیاں ہون گیاں۔ تاجراں دا کہنا اے کہ انج لگدا اے کہ منی بجٹ آ گیا اے۔ نِکے تاجراں نے گِلہ کیتا اے کہ ایس حکم نامے دے نتیجے وچ ساڈیاں اوکڑاں وچ وادھا ہوئے گا تے ساڈا کم مشکل ہو جائے گا۔
