راولپنڈی(پاکستان پوائنٹ نیوز23۔فروری2017ء) چیف آف آرمی سٹاف جنرل قمر جاوید باجوہ نے اج سیاچن دا دورا کیتا، آرمی چیف نے گیاری وچ یادگار شہداءاُتے پُھل چڑھائے۔ آئی ایس پی آر دے مطابق آرمی چیف جنرل قمر جاوید باجوہ نے گوما تے گلگت وچ فوجی جواناں نال ملاقات وی کیتی۔ آرمی چیف نے فوجی جواناں دے حوصلے تے جذبے دی تعریف کردے ہوئے آکھیا کہ ساڈے فوجی جواناں دا سیاچن وچ ڈاڈھی ٹھنڈے موسم وچ وی حوصلا اُچا اے۔
اوہناں نے آکھیا کہ مشرقی بارڈر اُتے چیلنجاں دا بھرپور جواب دین لئی تیار آں، داخلی سکیورٹی چیلنجاں دے مگروں بیرونی خطریاں توں غافل نہیں آں، ساڈی آزادی شہیداں دیاں قربانیاں دا نتیجہ اے۔ آرمی چیف نے آکھیاکہ ملک دی حفاظت لئی جان دین توں وڈی ہور کوئی سعادت نہیں اے۔ آرمی چیف نے گلگت بلتستان دے سرداراں نال ملاقات دوران آکھیا کہ گلگت بلتستان دے حقاں دے تحفظ لئی فوج تعاون کردی رہوے گی۔ آرمی چیف جنرل قمر باجوہ دے نال ایس موقعے اُتے کور کمانڈرراولپنڈی لیفٹیننٹ جنرل ندیم رضا وی سن۔
