لاہور(پاکستان پوائنٹ نیوز21۔فروری2017ء) مادری زباناں دے عالمی دیہاڑ دی مناسبت نال پنجاب انسٹی ٹیوٹ آف لینگویج آرٹ اینڈ کلچر وچ پنجابی ادبی بورڈ تے پنجابی پرچار ولوں اک سیمینار دا پربندھ کیتا گیا جہدی صدارت چئیرمین ہائیر ایجوکیشن کمیشن پنجاب نے کیتی۔گل بات دام±ڈھ اقبال قیصر ہوراں نے دیہاڑ دی تواریخی حیثیت اتے چانن پا کے بنھیا۔اوہناں آکھیا کہ بنگالی توں بعد ایس ملک وچ سبھ توں ودھ بولی جاون والی زبان پنجابی ای اے پر ایس نوں اگانہ ودھان واسطے سرکار نے اپنا کردار ادا نہیں کیتا اے جد کہ ہورزباناں نوں اگے لیاون واسطے خزانے دا مونہ کھول دتا گیا اے۔
سبھ توں ودھ پنجاب دے بال سکولاں توں نسدے نیں ایس دا کارن ماں بولی توں دوری اے۔طارق جٹالا ہوراں نے گل بات کردیاں آکھیا کہ پنجابی واحد زبان اے جہدے بولن والیاں دی گنتی سبھ توں چوکھی اے پر ایس زبان نوں فیر وی خطرا اے۔سندھ توں آئے لکھاری حفیظ چناں ہوراں نے آکھیا کہ میری زبان سندھی اے پر مینوں پنجابی توں ودھ طاقتور تے مٹھی زبان ہور کوئی نہیں لگدی اے۔
سندھ دا 22ویں گریڈ دا افسر وی سندھی وچ گل کرن اُتے فخر کردا پر پنجابی اپنی زبان بولن توں کنی کتراندے نیں۔توحید چٹھہ ہوراں نے آکھیا کہ پچھلی پیڑھی دی سیانف نوں اگلی پیڑھی نال جوڑنا چاہیدا اے۔ایہ دور گلوبلائزیشن دا دور اے ایس دورا اندر سوشل میڈیا راہیں لوکاں نال رابطا کیتا جا سکدا اے۔ایس طرحاں مڈھلی تعلیم واسطے جتن کرنے چاہیدے نیں۔
مدثر اقبال بٹ ہوراں نے آکھیا کہ قوم نوں اپنی مادری زبان توں محروم کرن والے غدار ہوندے نیں۔رائے ناصر ہوراں نے گلبات کردیاں دسیا کہ جیندے لوک اوہ ای ہوندے نیں جواپنی دھرتی تے کھلوتے ہوندے نیں دھرتی توں اتانہ تاں پھاہے لگے ہوندے نیں۔سانوں اپنی دھرتی نال ج±ڑنا چاہیدا اے۔عامر بٹ نے وی سوشل میڈیا نال اپنی گل اگانہ ٹورن واسطے آکھیا۔صدارتی گلبات کردیاں چئیرمین ہائیر ایجو کیشن کمیشن پنجاب ڈاکٹر نظام الدین ملک ہوراں نے آکھیا کہ پنجابیاں نوں اوہناں دی زبان ضرور ملنی چاہیدی اے۔
پرائمری توں پنجویں جماعت تک پنجابی زبان لاگو کرن واسطے جتن کردے آں۔سانوں ایہ ضرور سوچنا چاہیدا اے کہ پنجابی لوک اردو وچ کیو ں لکھ رہے نیں؟سارے پنجابیا ں نو ں چاہیدا اے کہ پنجابی وچ لکھن۔اخیر وچ پروین ملک ہوراں نے قراداد پیش کیتی جس وچ پرائمری توں مادری زبان پنجابی وچ تعلیم دین دی قراداد بارے لوکاں کولوں پچھیا گیا ایس قراداد نوں ہال وچ موجود سبھ لوکاں نے قبول کیتا۔ایس پروگرام واسطے نظامت دے فرایض ڈائریکٹر پلاک ڈاکٹر صغرٰی صدف ہوراں نے بہت سوہنے ڈھنگ نال نبھائے۔
