سیہون شریف(پاکستان پوائنٹ نیوز18۔فروری2017ء) لعل شہباز قلندر دی درگاہ اُتے ہون والے دھماکے وچ دو مختلف مسلکاں توں تعلق رکھن والے دو بیلی دنیا نوں بھائی چارے تے ہم آہنگی دی اک نویں مثال دے گئے۔ تفصیل دے مطابق سیہون شریف دھماکے وچ شہید ہون والے 85توں ودھ بندیاں وچ 18ورھیاں دا ذیشان علی تے 17ورھیاں دا سید علی وی شامل نیں، بھاویں دوواں دا تعلق دو مختلف مسلکاں توں سی پر اوہناں دی دوستی ایہناں ساریاں گلاں توں اُچی سی۔
دوواں دی دوستی بڑی ڈونگھی سی تے اوہ زندگی دا ہر کم اکٹھے کرن تے دن دا زیادا ویلا اکٹھے ای لنگھان دے عادی سن جدکہ موت ویلے دوواں نے اک دوجے دا ہتھ پھڑیا ہویا سی۔ سبھ توں پہلے ذیشان علی تے سعید دی ای نماز جنازہ لعل شہباز قلندر دی درگاہ دے برآمدے وچ پڑھی گئی۔ نماز جنازہ دی ادائیگی دوران سنی تے شیعہ مسلک توں تعلق رکھن والے بندیاں سنے ہندو مذہب توں تعلق رکھن والے بندیاں نے وی رلت کیتی ۔
دوویں بیلیاں نے مختلف مسلکاں توں تعلق رکھن مگروں وی دنیا نوں بھائی چارے، ہم آہنگی تے امن دا اک نواں پیغام دِتا۔ سعید علی دے انکل دا کہنا سی کہ دوویں نوجواناں نے دنیا نوں پیغام دِتا کہ دہشت گرد اںدے ہتھکنڈیاں توں اسیں نہیں گھبراواں گے۔ اوہناں نے آکھیا کہ دہشت گرد بھاویں ساڈے اُتے حملے کردے نیں اسیں درگاہ اُتے دھمال پان دا سلسلا جاری رکھاں گے۔
دوویں شہید نوجوان اکوجہیاں عادتاں دے مالک ہون دے نال نال درگاہ اُتے حاضری وی اکٹھے ای دیندے سن تے ایتھے آئے زائرین لئی رضا کارانا سرگرمیاں وچ حصہ وی لیندے۔ سعید علی دے انکل نیاز علی نے دسیا کہ میں ایہناں دوواں دیاں لاشاں دی شناخت اوہناں دے ہتھاں پاروں کیتی۔ موت آن اُتے دوواں نے اک دوجے دا ساتھ نہیں چھڈیا بلکہ اک دوجے دا ہتھ پھڑی رکھیا۔
