راولپنڈی(پاکستان پوائنٹ نیوز17۔فروری2017ء) افغانستان وچ لُکے دہشت گرداں خلاف پاک فوج ولوں آپریشن شرو ع کر دِتا گیا اے، پچھلے دیہاڑے سندھ دے شہر سیہون شریف وچ واقع حضرت لعل شہباز قلندر دی درگاہ اُتے آپ مارو حملے مگروں پاکستان دی عسکری قیادت ولوں اعلان کیتا گیا سی کہ ہن دہشت گرداں نوں کسے صورت نہیں بخشیا جائے گا۔ پاکستان وچ ہون والے پچھلے دِنا دہشت گردی دے تانے بانے افغانستان وچ موجود دہشت گرداں نال ملدے نیں۔
پاک فوج افغانستان وچ لُکے اوہناں دہشت گرداں نوں وی لبھ لبھ کے مارے گی۔ ہن کئی غیر ملکی خبر رساں اداریاں تے ایجنسیاں ولوں دِتیاں جان والیاں تفصیلاں دے مطابق پاک فوج نے افغانستان وچ موجود دہشت گرداں خلاف باقاعدا کارروائی شروع کر دِ تی اے۔ پاک فوج نے جمعے دے دیہاڑے افعانستان دے مشرقی صوبے وچ دہشت گرداں دے ٹھکانیاں اُتے گولا باری کیتی اے۔ یاد رہوے کہ ایہ اوہی علاقا اے جتھے داعش تے کالعدم تحریک طالبان پاکستان دی قیادت لُکی ہوئی اے۔
