اسلام آباد(پاکستان پوائنٹ نیوز16۔فروری2017ء) مسلم لیگ (ن) دے رہنما دانیال عزیز نے آکھیا اے کہ ہر روز ساڈے وکیلاں توں نویں سوال کیتے جاندے نیں تے دوجے دیہاڑے اوہناں نوں بھرپور جواب دیندے آں۔ اوہناں نے آکھیاکہ حسین نواز تے حسن نواز جلاوطنی توں ای ملکوں باہر روزی کما رہے نیں تے اوہ قانون دے مطابق پاکستان وچ ٹیکس نادہندڑ نہیں نیں، حسن نواز تے حسین نواز نے رضا کارانا طور اُتے عدالت نوں تفصیلاں دِتیاں نیں تے وزیر اعظم نے اپنے آپ نوں تے اپنے خاندان نوں احتساب لئی پیش کیتا اے۔
50ورھیاں دا حساب دے رہے اں پر عمران خان کولوں چار ورھیاں دا دے حساب دا جواب نہیں دِتا رجارہیا۔اوہناں دا کہنا سی کہ جدوں اسیں حساب منگن دیاں منی ٹریل دے آکھدے آں تے اوہ آکھدے نیں کہ سانوں بلیک میل کیتا جا رہیا اے۔ اوہناں دا کہنا سی اج عدالت نے آپ آکھیا اے کہ پاکستان تحریک انصاف دیاں دستاویزات سنوائی جوگ نہیں اے، ساریاں دستاویزات مسلم لیگ (ن) نے دِتیاں تے ایس بنیاد اُتے کیس اگانہ ودھیا۔
اوہناں دا کہنا سی کہ عمران خان چاہندے نیں کہ ہن اسیں رسی تے تختہ وی آپ لیائیے تے لٹک وی آپ جائیے۔ اوہناں دا عمران خان نوں مخاطف کردے ہوئے کہنا سی کہ خان صاحب انج نہیں چلے گاتُسیں عدالت وچ ثبوت دیو، بار بار عدالت ثبوت منگدی اے پر تہاڈے کول دین لئی کُجھ نہیں ہوندا۔ اوہناں نے آکھیا کہ عمران خان یوٹرن دے عادی نیں۔ 35پنگچر والی گل کر کے وی مُکر گئے فیر عدالت وچ معافی وی منگی تے آکھیا کہ ایہ سیاسی بیان سی پر عمران خان تے جہانگیر ترین ہن اسیں تہانوں یوٹرن نہیں لین دیاں گے تہانوں حساب دینا پئے گا۔
