پشاور(پاکستان پوائنٹ نیوز15۔فروری2017ء) پی ٹی آئی چیئرمین عمران خان نے آکھیا اے کہ اسیں لاہور تے پشاور وچ دہشت گرد حملیاں دی نندیا کردے آں۔ تفصیل دے مطابق حیات آباد میڈیکل کمپلیکس وچ میڈیا نال گل بات کردے ہوئے پاکستان تحریک انصاف دے چیئرمین عمران خان دا کہنا سی کہ اج پشاور حملے وچ ججاں نوں نشانا بنایا گیا۔ خدا دا شکر اے کہ اج پشاور وچ ہون والے دہشت گرد حملے وچ جج بچ گئے نیں پر بدقسمتی نال ایس حملے نے اک ڈرائیور دی جان لے لئی اے۔
اوہناں نے آکھیا کہ حملے مگروں اسیں حیات آباد میڈیکل کمپلیکس وچ ہون والی تقریب منسوخ کر دِتی اے۔ پی ٹی آئی چیئرمین عمران خان نے آکھیا کہ نیشنل ایکشن پلان اُتے پورے ملک وچ اتفاق ہویا اے جہدے مگروں دہشت گرداں خلاف آپریشن نوںہور تیز کیتا گیا۔ عمران خان نے آکھیا کہ فاٹا دے خیبر پختونخوا وچ ضم ہون توں وکھ ہور کوئی راہ نہیں اے۔ اوہناں نے آکھیا کہ جنی چھیتی فاٹا دا خیبر پختونخوا وچ انضمام ہووے گا اونی ای چھیتی اصلاحات کیتیاں جان گیاں تے دہشت گردی دا خاتما ہووے گا۔
اوہناں دا کہنا سی کہ فاٹا نوں وکھ صوبا بنانا چنگی گل نہیں اے۔ اوہناں نے آکھیا کہ فاٹا دی بحالی لئی وسائل چاہیدے ہون گے جو حکومت نوں دینے پین گے، ضرب عضب ختم ہون اُتے فاٹا تے خیبر پختونخوا نے اک ہونا سی۔ فاٹا تے خیبر پختونخوا دے انضمام لئی پورا پاکستان راضی اے۔ وفاقی حکومت نوں چاہیدا کہ اوہ فاٹا نوں فنڈز دیوے۔ عمران خان نے اک سوال دے جواب وچ آکھیا کہ میں سُنیا اے کہ دہشت گرداں نے ملک بھر وچ دہشت گردی کرن دا اعلان کیتا اے۔ دہشت گرداں نال نبڑن لئی اسیں ساریاں نیں سکیورٹی اداریاں نال تعاون کرنا اے جدکہ سکیورٹی نوں ہور بہتر بنان لئی سکیورٹی فورسز نوں ہور تیاری کرنی پئے گی۔
