کوئٹہ(پاکستان پوائنٹ نیوز14۔فروری2017ء) بارودی مواد ناکارا بنان دے دوران بم ڈسپوزل سکواڈ دے شہید ہون والے اہلکار عبدالرزاق دے آخری الفاظ ’ماں میرے لئی دعا کری‘ سن۔ بم ڈسپوزل سکواڈ دے اہلکار دی ماں دا کہنا اے کہ اوہنوں اپنے پُتر دی شہادت اُتے فخر اے، اوہنے اپنی جان دے کے کئی لوکاں دی جان بچائی۔ تفصیل دے مطابق میڈیا نال گل بات کردے ہوئے عبدالرزاق دی ماں جی دا کہنا سی کہ دھماکے توں کجھ دیر پہلے اوہ گھر اندر بھتیجے نال کھیڈ رہیا سی ، اوہ اپنے بھتیجے نال بہت پیار کردا سی ، جہدے مگروں اوہنوں فون اُتے اطلاع ملی۔
عبدالرزاق دی ماں دا کہنا سی کہ پُتر نے جاندے ہوئے آخری وار ایہو آکھیا کہ ’ماں میرے لئی دعا کری‘۔ عبدالرزاق دی ماں دا کہنا سی کہ مینوں پُتر دی شہادت بارے دیر نال دسیا گیا پہلے ٹی وی اُتے اوہدی شہادت بارے خبر چل رہی تے اوس دوران گھر دے ہور جیاں نے ٹی وی بند کر کے آکھیا کہ اوہ صرف زخمی ہویا اے، اسیں ہسپتال جا رہے آں۔ اوہناں نے آکھیا کہ میرے بالاں وچوں سبھ توں بہتا میرا خیال عبدالرزاق ای رکھدا سی، اوہنے ویاہ نہیں کیتا سی، پُچھن اُتے آکھدا سی جے میں ویاہ کراں تے جے میں کسے دھماکے وچ شہید ہو گیا تے گھر والیاں دا خیال کون رکھے گا۔
